नेपालमा आज अठारौँ गणतन्त्र दिवस विविध कार्यक्रमका साथ देशभर मनाइँदैछ। २०६५ सालको जेठ १५ गते पहिलो संविधानसभाको ऐतिहासिक बैठकबाट २४० वर्ष लामो निरङ्कुश राजतन्त्रको औपचारिक अन्त्य गर्दै सङ्घीय लोकतान्त्रिक गणतन्त्रको घोषणा गरिएको थियो।
जनआन्दोलन–२०६२/०६३ र त्यसअघिको माओवादी सशस्त्र सङ्घर्षको उपलब्धिका रूपमा गणतन्त्र स्थापना गरिएको हो। यसले नेपाली जनतालाई समावेशी, समानुपातिक प्रतिनिधित्वसहितको लोकतान्त्रिक शासन प्रणाली र नागरिक सर्वोच्चताको प्रत्याभूति दिएको छ।
गणतन्त्र दिवस मूल समारोह समिति अन्तर्गत सैनिक मञ्च टुँडिखेलमा विशेष कार्यक्रम आयोजना गरिएको छ। कार्यक्रममा राष्ट्रपति रामचन्द्र पौडेल, उपराष्ट्रपति, प्रधानमन्त्री, मन्त्रीहरू, राजनीतिक दलका शीर्ष नेता, सुरक्षानिकायका प्रमुखलगायत विशिष्ट व्यक्तिहरूको उपस्थिति रहेको छ।
सो अवसरमा राष्ट्र निर्माणका लागि जीवन उत्सर्ग गर्ने सहिदहरूलाई श्रद्धाञ्जलि अर्पण गर्दै लोकतन्त्र स्थापनाका लागि संघर्ष गर्ने अग्रजहरूको योगदानलाई सम्मान गरिएको छ।
नेताहरूले अबको चुनौती नागरिकको जीवनस्तर सुधार, सुशासन, रोजगारी, न्याय र समृद्ध अर्थतन्त्र निर्माणमा केन्द्रित हुनुपर्ने बताएका छन्। उनीहरूका अनुसार लोकतान्त्रिक गणतन्त्र अब शासन प्रणाली मात्र नभई नागरिक जीवनशैलीको मेरुदण्ड बन्नु जरुरी छ।
गणतन्त्रलाई अझ संस्थागत गर्न समाजका सबै तहमा समान अवसर र सहभागिताको प्रत्याभूति दिलाउँदै राष्ट्रलाई आत्मनिर्भर र समुन्नत बनाउने साझा संकल्प आजको दिनले स्मरण गराउँछ।
