आईपीएल २०२५ को एलिमिनेटर खेलमा मुम्बई इन्डियन्सले गुजरात टाइटन्सलाई २० रनले पराजित गर्दै क्वालिफायर–२ मा स्थान पक्का गरेको छ। अब मुम्बईले फाइनल प्रवेशका लागि आइतबार, जुन १ मा पञ्जाब किङ्ससँग प्रतिस्पर्धा गर्नेछ।
मुम्बईले नयाँ चण्डीगढस्थित महाराजा यादवेन्द्र सिंह अन्तर्राष्ट्रिय रंगशालामा टस जितेर पहिले ब्याटिङ गर्दै ५ विकेट गुमाएर २२८ रन बनायो। रोहित शर्माले ५० बलमा ८१ रनको उत्कृष्ट पारी खेले, जसमा ९ चौका र ४ छक्का समावेश थिए। जोनी बेयरस्टोले ४७, सूर्यकुमार यादवले ३३ तथा कप्तान हार्दिक पाण्ड्याले अविजित २२ रन बनाए।
जवाफमा गुजरात ६ विकेट गुमाउँदै २०८ रनमै सीमित रह्यो। साई सुदर्शनले ८० रनको साहसी प्रयास गरे भने वाशिङ्गटन सुन्दरले ४८ रन बनाए। ट्रेन्ट बोल्टले कप्तान शुभमन गिललाई सुरुमै एलबीडब्लु आउट गरे। ग्लीसन, स्यान्टनर र बुमराहले समेत महत्त्वपूर्ण विकेट लिए।
गुजरातका प्रसिद्ध कृष्णा र साई किशोरले समान २–२ विकेट लिए पनि टोलीको जितको आशा पुरा हुन सकेन। बलिङ र ब्याटिङ दुवैमा उत्कृष्ट प्रदर्शन गर्दै मुम्बईले उपाधि यात्रालाई अझ अगाडि बढाएको छ।
