भारतको गुवाहाटीमा जारी टी–२० सिरिजको चौथो खेलमा आसामले नेपाल ‘ए’लाई १८ रनले हराएको छ। आसामले दिएको १७५ रनको लक्ष्य पछ्याएको नेपाल ‘ए’ले २० ओभरमा ९ विकेट गुमाएर १५६ रन मात्र बनाउन सकेको हो।
नेपाल ‘ए’का कप्तान अनिल साहले सर्वाधिक ६७ रन बनाए पनि टोलीलाई जित दिलाउन सकेनन्। टस जितेर पहिले ब्याटिङ गरेको आसामले २० ओभरमा ५ विकेट गुमाएर १७४ रन बनाएको थियो। कप्तान सुमित घडिअन्करले सर्वाधिक अविजित ७० रन बनाए र २०औं ओभरको पहिलो बलमा रिटायर्ड भए।
नेपालका आकाश चन्दले २ विकेट लिएका थिए भने बसिर अहमदले १ विकेट लिए। सिरिजको पहिलो खेलमा नेपाल ‘ए’ १५ रनले पराजित भएको थियो, दोस्रो खेलमा ९६ रनले विजयी भएको थियो भने तेस्रो खेलमा ९ रनले विजयी भएको थियो। नेपाल ‘ए’सँग आसामसँग कुल ५ खेल खेल्ने तालिका रहेको छ।
