काठमाडौंमा जारी नेपाल स्ट्रिट प्रिमियर लिग (एनएसपिएल) क्रिकेट प्रतियोगितामा खप्तड सुदूरपश्चिम थन्डरले आफ्नो पहिलो खेलमा विजयी सुरुवात गरेको छ। टि–१० फर्म्याटमा मंगलबार भएको खेलमा सुदूरपश्चिमले लुम्बिनी राइडर्सलाई ६ विकेटले पराजित गर्यो।
लुम्बिनीले टस जितेर ब्याटिङ रोज्दा १० ओभरमा ९ विकेट गुमाउँदै ६१ रन बनायो। लुम्बिनीका लागि दीप नारायणले सर्वाधिक २५ रन बनाए। ६२ रनको लक्ष्य सामना गर्दै सुदूरपश्चिमले ७.४ ओभरमा ४ विकेट गुमाएर लक्ष्य पूरा गर्यो। कृष्ण बिष्टले २६ र केशवचन्द्र डिसीले १६ रन योगदान गरे। खेलमा उत्कृष्ट प्रदर्शन गर्ने दीपकराज जोशी म्यान अफ द म्याच घोषित भए।
प्रतियोगितामा देशभरका ७ प्रदेशबाट ७ टिम सहभागी छन्। लिग चरण सिंगल राउन्ड रोबिन प्रणालीमा हुनेछ भने शीर्ष ४ टिमले सेमिफाइनलमा स्थान बनाउनेछन्। विजेताले २१ लाख रुपैयाँ, उपविजेताले ११ लाख रुपैयाँ पुरस्कार पाउने छन्।
