बिश्वका पहाड पर्वत भन्दा नेपालका पनि कम छैनन, एसियाकै अग्लो ठाउमा रहेको झोलुङ्गे पुलबारे हेर्नुहोस रोचक तथ्य

label सुदूर खबर संवाददाता query_builder October, 09 2018

बेसीशहर : हिमाली जिल्ला मनाङको दुई गाउँ जोड्न बनाइएको झोलुङ्गे पुल एसियाकै अग्लो भएको पाइएको छ। तल्लो मनाङको नासो गाउँपालिका-२, नाचै र वडा नम्बर ५ थोंचे ताम्राङ जोड्न बनाइएको झोलुंगे पुल एसियाकै अग्लो भएको हो।

डोना खोलामाथि निर्माण गरिएको उक्त झोलुङ्गे पुल पानीको सतहबाट ४ सय १२ मिटर उचाइमा छ। निर्माण भएको तीन बर्षपछि यसको नाप लिइएको हो।नासो गाउँपालिकाका इन्जिनियर सुभाष पाण्डेयको टोलीले पुलको नाप लिएको हो।

पाण्डेयका अनुसार पुलको लम्बाई १ सय ३५ मिटर छ। ‘अग्लो ठाउँमा पुल बनाइए पनि अहिलेसम्म नाप लिइएको रहेनछ’, इन्जिनियर पाण्डेयले भने, ‘उचाई नाप्न गाउँपालिकामा निवेदन आएपछि जनप्रतिनिधिको रोहबरमा प्राविधिक टोलीले नाप लिएका हौँ।’ पुलबाट पानीको सतहसम्म धागो लगाएर पुलको नाप लिइएको उनले बताए।

‘पुल बनेपछि आउजाउ मात्रै भयो। यसको नाप लिनतिर ध्यानै गएको थिएन’, नासो गाउँपालिका-२ का वडाअध्यक्ष भीमबहादुर गुरुङले भने, ‘अहिले नाप्दा पुल संसारकै अग्लोमा पर्ने थाहा भयो।’ उक्त पुल तत्कालीन संघीय मामिला तथा स्थानीय विकास मन्त्रालय अन्तर्गत स्थानीय पूर्वाधार विकास तथा कृषि सडक विभागको सस्पेन्सन ब्रिज डिभिजनले २०७२ मा बनाएको हो।

विश्वका सबैभन्दा अग्ला पाँच झोलुङ्गे पुल सबै चीनमा छन्। यसरी हेर्दा मनाङको डोनाखोलाको झोलुङ्गे पुलले विश्वको पाँचौ अग्लो पुलको पहिचान बटुलेको छ। यसले दक्षिण एसियामै सबैभन्दा अग्लो पुल मनाङको नासों गाउँपालिकामा रहेको पुष्टि गर्छ।

उक्त पुललाई सूचीमा राख्ने हो भने हाल चीनको छिङ्सुई खोला पुल (४ सय ६ मिटर उचाई) छैटौं नम्बरमा पर्छ। विश्वमै सबैभन्दा अग्लो पुल चीनकै तुक पुल ५ सय ६५ मिटर उचाइको छ। यस्तै दोस्रो अग्लो पुल चीनकै स्रतु खोला पुल ४ सय ९६ मिटर उचाइको छ। तेस्रो अग्लो पुल फुली पुल ४ सय ८५ मिटर अग्लो छ। चौंथो चीनकै याठ्र खोला पुल ४ सय ३४ मिटर उचाइको छ।

नेपालमा हालसम्म सबैभन्दा अग्लो भनिएको पर्वतको कुस्मास्थित झुलुङ्गे पुलको उचाई नदीको सतहबाट १ सय ५६ मिटर रहेको छ। ‘सबैले अग्लो भनेका कारण हामीले पुलको उचाई नाप लियौं। उचाई ठिक ४ सय १२ मिटर छ’, गाउँका मान्छे वारपार गर्न बनाइएको झोलुंगे पुल विश्वकै अग्लो सूचीमा पर्ने देखिएपछि यसले पर्यटन प्रवद्र्धनमा टेवा पुग्ने गाउँपालिकाका अध्यक्ष चन्द्र घलेले बताए।

‘अब विश्वकै अग्लो पुलको प्रचारप्रसार हुनेगरी पर्यटन प्रवद्र्धनका कार्यक्रम बनाउँछौ’, गाउँपालिका अध्यक्ष घलेले भने, ‘हामीसँग अरु धेरै कला संस्कृति र सम्पदा छन। विश्वकै सबैभन्दा अग्लो ठाउँमा तिलिचो (४,९१९ मिटर) हिमताल, विश्वकै सबैभन्दा अग्लो हिमाली पदमार्ग भञ्ज्याङ थोराङला (५,४१६ मिटर) पनि मनाङमै पर्छ। मनाङले अब एसियाकै सबैभन्दा अग्लो पुलको रेकर्डसमेत थप्ने भएको छ ।

पर्वत जिल्लाको सदरमुकाम कुश्मा र मुडिकुवालाई जोड्न बनेको तीनसय ५९ मिटर लामो र एक सय ५७ मिटर उचाइको झोलुङ्गे पुललाई एशियाकै लामो र अग्लो भएको दावी गरिएको छ । मोदीखोलाको खोँचमा निर्माण भएको सो झोलुङ्गे पुल सिङ्गल स्पानबाट निर्माण गरिएको हो ।

निर्माण कम्पनी ‘मुक्तिनाथ एण्ड ओम गिता जेभि’ले स्थानीयको सहयोग र निर्माण सामाग्रीको सहजताका कारण निर्धारित समयभन्दा चार महिना अगाडि नै पुलको निर्माण सम्पन्न भएको छ । स्थानीय पुर्वाधार विकास तथा कृषि सडक बिभाग (डोलिडार) अन्तर्गत झोलुङ्गे पुल महाशाखाको लगानीमा निर्मित पुलको लागत एक करोड ७६ लाख ९९ हजार छ ।

मुडिकुवाका सामाजिक कार्यकर्ता ऋषिकेश तिवारीको अगुवाईमा चार वर्षअघि सर्भे गरिएको पुल स्थानीय विकास मन्त्रालयको लगानीमा निर्माण भएको हो । पुल बनेपछि मुडिकुवा, शंकरपोखरी, थापाठाना, देबिस्थान, खानीगाउँ सहित दक्षिण पर्वतका दुई दर्जनबढी गाविसका साथै बाग्लुङ र गुल्मीसमेतका केही गाविसबासीलाई पैदल हिड्दा करिब दुई घण्टा लाग्ने बाटो पुलले केही मिनेटमै छोट्याएपछि सर्वसाधारणहरु प्रसन्न छन् ।

२०६६ सालमा निर्मित कुश्मा–ज्ञादी तीन सय ४४ र गत ७२ असोजमा निर्मित कुश्मा–कैया पुल तीन सय ४७ मिटर लम्बाई र एक सय ४६ मिटर उचाईका छन् । कुश्माका तिनवटै पुल मुलुककै अग्लामध्येका पहिलो, दोस्रो र तेस्रो हुन् । थप जानकारीको लागि भिडियो :-

तपाईंको प्रतिक्रिया दिनुस्