दार्चुलाबाट भेडा–च्याङ्ग्रा काठमाडौं निर्यात

label सुदूरखबर संवाददाता query_builder October, 11 2018

दार्चुला, असोज २५ । दसैं तिहारका लागि दार्चुलाबाट करीब ७ सय ५० भेडा–च्याङ्ग्रा पोखरा तथा काठमाडौं निर्यात गरिएको छ । जिल्लामै भेडा खसीको मासु अभाव भइरहेका बेला अपिहिमाल, मार्मा, नौगाड गाउँपालिका र शैल्यशिखर नगरपालिकाबाट भेडा–च्याङ्ग्रा निर्यात गरिएको गोकुलेश्वरस्थित ट्राफिक प्रहरी पोष्टले जनाएको छ ।

जिल्ला पशु शाखा कार्यालयले स्वास्थ्य परीक्षण प्रतिवेदन दिएपछि २ सय ६० भेडा, तथा स्कालिम जातका ४ सय ७३ च्याङ्ग्रा ढुवानी गरिएको पशु चिकित्सक मोहनदेव भट्टले बताए । विगतमा तिब्बतबाट भेडा–च्याङ्ग्रा आयात हुने गरेकामा पछिल्लो समय दार्चुलाबाटै बाह्य जिल्ला निर्यात हुन थालेको उनकाे भनाइ थियो ।

यस वर्ष तिब्बतेली भेडा–च्याङ्ग्रा हालसम्म आयात नभएको व्यास गाउँपालिका वडाअध्यक्ष अशोकसिंह बोहराले बताए । ‘विगतमा सयौँ भेडा–च्याङ्ग्रा तिब्बतबाट आयात हुन्थ्यो,’ उनले भने, ‘यस वर्ष हालसम्म आएको छैन ।’ व्यापारीले जिल्लाबाट ७० हजार भाडा तिरेर भेडा च्याङ्ग्रा पोखराका लागि ढुवानी गरेको ट्रक व्यवसायी मोहनसिंह ऐरीले बताए ।

  • रासस
तपाईंको प्रतिक्रिया दिनुस्