बझाङको सुर्मा गाउँपालिका वडा नम्बर (१ का ३२ वर्षीय प्रेम बहादुर बोहरालाई नाबालिका हत्या आरोपमा पक्राउ गरिएको छ। उनलाई उनकी श्रीमती मन्कली साउँदले दिएको उजुरीका आधारमा नियन्त्रणमा लिइएको प्रहरीले जनाएको छ ।
जिल्ला प्रहरी कार्यालय बझाङका सूचना अधिकारी तथा प्रहरी निरीक्षक किशोर जोशीका अनुसार सोमवार अदालतबाट अनुमति लिएर घटनाको अनुसन्धान सुरु गरिएको छ।
प्रहरीले दिएको जानकारी अनुसार, २०८१ मंसिर २ गते साँझ मदिरा सेवन पछि श्रीमती मन्कली साउँद सँग विवाद हुँदा बोहराले कुटपिट गरी १ वर्षीय सौतेली छोरी गिता साउँदको हत्या गरेको आरोप लागेको छ । मृतक बालिकाको शव पोस्टमार्टमका लागि जिल्ला अस्पतालमा राखिएको छ भने रिपोर्ट आउन बाँकी छ।
गत भदौ २२ गते अछामको मंगलसेन नगरपालिका वडा नम्बर ३ बाट मन्कलीसँग भागी बिहे गरेका प्रेमले सौतेली छोरी भन्दै गिताको हत्या गरेको भनिएको छ। मन्कलीले अर्काकी छोरी सँगै ल्याएको भन्दै तनावमा रहेको प्रहरीको प्रारम्भिक अनुसन्धानबाट खुलेको छ । घटना आइतवार साँझ भएको भए पनि प्रहरीमा उजुरी भने सोमवार मात्र दर्ता भएको हो। प्रहरीले घटनाबारे थप अनुसन्धान जारी रहेको जनाएको छ।
