बझाङः बझाङको मष्टा गाउँपालिकाले सामुदायिक विद्यालयमा कार्यरत शिक्षक तथा कर्मचारीहरूको तलब विद्युतीय भुक्तानी प्रणाली EFT मार्फत प्रदान गर्ने भएको छ ।
पालिकाको आ व २०८१।८२ को नीति तथा कार्यक्रम लाई कार्यान्वयन गर्न शिक्षक तथा विद्यालय कर्मचारीहरूको तलब भत्ता मासिक रूपमा विद्युतीय भुक्तानी प्रणाली EFT मार्फत व्यक्तिगत बैङ्क खातामा पठाउने व्यवस्था गरिएको हो ।
साथै यो माघ महिनाको तलब समेत शिक्षक कर्मचारीकोे खातामा निकासा गरिएको मष्टा गाउँपालिकाका नि.प्रमुख प्रशासकीय अधिकृत रमेश कुमार खड्काले बताउनुभयो ।
यो कार्यले विद्यालयको शैक्षिक गुणस्तर कायम गर्न,शिक्षकको नियमितता र व्यवस्थापनमा सुधार गर्न , विद्यालयमा शैक्षिक सुशासन कायम गर्न र विद्यालयको प्रशासनिक र आर्थिक पक्षमा सहजता कायम गर्न मद्धत पुग्ने मष्टा गाउँपालिका शिक्षा अधिकृत पृथुता जोशीले बताउनुभयो ।
यसबाट आर्थिक प्रणालीलाई थप व्यवस्थित र डिजिटल युगसँग जोड्न सहयोग पुग्ने अपेक्षा गरिएको छ । यो काम गर्ने बझाङको मष्टा गाउँपालिका पहिलो र सुदूरपश्चिमको चौथो रहेको छ ।
