धनगढीः धनगढी उपमहानगरपालिका–२ सन्तोषी टोलमा अवस्थित बाजुरेली सेवा समाज धनगढी कैलालीका संस्थापक अध्यक्ष स्वर्गीय भीमबहादुर शाहको सम्झनामा १३औं दिनको पुण्यतिथिमा श्रद्धाञ्जली कार्यक्रम सम्पन्न भएको छ । सोमबार उनकै निवासमा आयोजित उक्त कार्यक्रममा बाजुरेली सेवा समाज धनगढी कैलालीका पदाधिकारी, सल्लाहकार, साधारण सदस्य तथा स्थानीय समुदायका प्रतिनिधिहरूको उल्लेखनीय उपस्थिति रहेको थियो । यो कार्यक्रमले स्वर्गीय शाहको योगदानलाई स्मरण गर्दै समाजमा एकता र प्रेरणाको सन्देश प्रवाह गरेको छ ।
कार्यक्रम समाजका वर्तमान अध्यक्ष भरतबहादुर केसीको अध्यक्षतामा सम्पन्न भएको थियो । यस अवसरमा समाजका वरिष्ठ उपाध्यक्ष रामचन्द्र जोशी र कानुनी सल्लाहकार गंगाराम पाध्यायले स्वर्गीय शाहप्रति भावपूर्ण श्रद्धाञ्जली मन्तव्य राख्नुभएको थियो । अध्यक्ष केसीले संस्थापक अध्यक्ष स्वर्गीय शाहले समाजलाई स्पष्ट मार्गदर्शन प्रदान गरेको बताउँदै उहाँकै दिशानिर्देशमा समाजले निरन्तर काम गर्ने प्रतिबद्धता व्यक्त गर्नुभयो । उहाँले भने, ूस्वर्गीय शाहको अतुलनीय योगदानको सम्मान सधैं जीवित रहनेछ । उहाँले समाजलाई मजबुत आधारशिला दिनुभयो, जसले हामीलाई अघि बढ्न प्रेरित गर्छ ।
स्वर्गीय भीमबहादुर शाहको यही भाद्र २६ गते आफ्नै निवासमा ७३ वर्षको उमेरमा निधन भएको थियो । उहाँ बाजुरा जिल्लाबाट धनगढीमा बसोबास गर्नेहरूको हितमा समर्पित एक निडर समाजसेवीका रूपमा चिनिनुहुन्थ्यो । बाजुरेली सेवा समाजको स्थापना गरी उहाँले स्थानीय समुदायको विकास, सामाजिक सेवा र कल्याणकारी कार्यहरूमा महत्वपूर्ण योगदान दिनुभएको थियो । समाजले मुख्य रूपमा बाजुरेली समुदायका सदस्यहरूको लागि सामुदायिक विकास, शिक्षा, स्वास्थ्य तथा अन्य सामाजिक क्रियाकलापहरू सञ्चालन गर्दै आएको छ । स्वर्गीय शाहलाई समाजको अभिभावकका रूपमा सम्मान गरिन्थ्यो, र उहाँको निधनले समाजलाई अपूरणीय क्षति पुगेको छ ।
स्वर्गीय शाह स्थानीय स्तरमा सामाजिक सेवामा लामो समयदेखि सक्रिय रहनुभएको थियो । उहाँले बाजुरेली समुदायलाई एकीकृत गर्दै विभिन्न चुनौतीहरूको सामना गर्न सिकाउनुभयो । उहाँको नेतृत्वमा समाजले विद्युत् सेवा सुधार, सामुदायिक विकास परियोजना तथा अन्य सामाजिक कार्यहरूमा योगदान दिएको स्थानीयहरू बताउँछन् । विशेष गरी, धनगढीमा बसोबास गर्ने बाजुरेलीहरूको लागि उहाँले शिक्षा र स्वास्थ्य जस्ता क्षेत्रमा सहयोग पुर्याउनुभएको थियो । उहाँको निधनपछि समाजका सदस्यहरूले उहाँको योगदानलाई स्मरण गर्दै थप क्रियाशील हुने प्रतिबद्धता जनाएका छन् । कार्यक्रमको सञ्चालन समाजका सचिव हर्कबहादुर ओलीले गर्नुभएको थियो । उहाँको आत्माको चिरशान्तिको कामना गर्दै कार्यक्रम समापन भएको थियो ।
