कैलालीको धार्मिक तथा पर्यटकीय गन्तव्य गोदावरी धाममा माघे संक्रान्तिको अवसरमा आज बिहानैदेखि स्नान गर्ने श्रद्धालु भक्तजनको ठूलो भिड लागेको छ। माघ १ गते पवित्र स्नान गरे पुण्य प्राप्त हुने धार्मिक विश्वासका कारण सुदूरपश्चिमका विभिन्न जिल्लासहित छिमेकी प्रदेशबाट समेत भक्तजन गोदावरी धाम पुगेका छन्।
बिहान सबेरैदेखि गोदावरी खोलामा स्नान गर्ने, पूजा–अर्चना गर्ने र दान–धर्म गर्ने श्रद्धालुहरूको चहलपहल बढेको छ। परिवारसहित आएका भक्तजनहरूले गोदावरी धामको धार्मिक महत्त्व झनै बढ्दै गएको बताएका छन्। माघे संक्रान्तिलाई सूर्य धनु राशिबाट मकर राशिमा प्रवेश गर्ने दिनका रूपमा लिइन्छ, जसका कारण यस दिनको स्नान विशेष फलदायी मानिन्छ।
केही वर्षयता माघे संक्रान्तिको दिन गोदावरी धाममा स्नान गर्ने परम्परा थप व्यापक बन्दै गएको छ। पहिले सीमित संख्यामा मात्र भक्तजन पुग्ने यस क्षेत्रमा पछिल्ला वर्षहरूमा उल्लेख्य रूपमा श्रद्धालुको आगमन बढेको स्थानीयवासी बताउँछन्। धार्मिक आस्थासँगै गोदावरी धामको प्रचार–प्रसार, सडक पहुँच र स्थानीय तहको व्यवस्थापनले पनि भिड बढ्न सहयोग पुगेको छ।
भीडलाई व्यवस्थित गर्न सुरक्षाकर्मी परिचालन गरिएको छ भने नगरपालिकाले सरसफाइ, यातायात तथा आधारभूत सेवामा सहजीकरण गरेको छ। माघे संक्रान्तिको अवसरमा गोदावरी धाम आज धार्मिक उत्सवस्थलको रूपमा परिणत भएको छ।
