बझाङः आगामी फागुन २१ गते हुने प्रतिनिधि सभा सदस्य निर्वाचनलाई शान्तिपूर्ण र व्यवस्थित रूपमा सम्पन्न गराउन बझाङमा सुरक्षा व्यवस्था कडा पारिएको छ। जिल्ला प्रशासन कार्यालय र निर्वाचन संयन्त्रले तयारीलाई तीव्र बनाउँदै झन्डै तीन हजार सुरक्षाकर्मी परिचालन गर्ने निर्णय गरेको छ।
आइतवार जिल्ला निर्वाचन कार्यालय बझाङले सञ्चारकर्मीसँग गरेको अन्तरक्रिया कार्यक्रममा निर्वाचन तयारीबारे विस्तृत जानकारी प्रदान गरिएको थियो ।
जिल्ला निर्वाचन कार्यालय बझाङका कार्यालय प्रमुख वसन्त बहादुर धानुकका अनुसार निर्वाचनका लागि एक हजार एक सय ३४ जना कर्मचारी खटन पटन भइसकेको छ भने उनीहरूलाई आवश्यक तालिम प्रदान गर्ने कार्य अन्तिम चरणमा पुगेको छ ।
मतदाता शिक्षालाई प्राथमिकतामा राख्दै फागुन ३ गतेदेखि जिल्लाका १२ वटै स्थानीय तहका ९४ वडामा स्वयंसेवक परिचालन गरिएको छ। यो चुनावमा दोहोरो नाम भएका २८६ जना र मृत्यु भएका ९ सय ६० जनाको नाम हटाइएको उहाँले बताउनुभयो ।
जिल्लामा कुल १ लाख २६ हजार ९ सय ३ मतदाता रहेका छन्। तीमध्ये ६२ हजार २ सय ८९ पुरुष र ६४ हजार ६ सय १४ महिला मतदाता रहेका छन्। निर्वाचनका लागि १८९ मतदान केन्द्र र १३७ मतदानस्थल तोकिएका छन्। तीमध्ये तीन मतदानस्थल सामान्य, ४९ संवेदनशील र ८५ अति संवेदनशील श्रेणीमा राखिएको प्रमुख जिल्ला अधिकारी मुकेश कुमार केशरीले बताउनुभयो ।
मुख्य निर्वाचन अधिकृत सुवर्णमान बनेपालीका अनुसार जिल्लामा ५१ प्रकारका निर्वाचन सामग्री पुगिसकेको र केही दिनभित्रै मतदान स्थलमा सामग्री ढुवानी र व्यवस्थापन गरिने बताउनुभयो ।
प्रमुख जिल्ला अधिकारी मुकेश कुमार केशरी र जिल्ला प्रहरी कार्यालयका डीएसपी खगेन्द्र धमलाले २०७९ सालको निर्वाचनमा भएका कमजोरी नदोहोरिने गरी समन्वयात्मक सुरक्षा योजना सहित सुरक्षा व्यवस्था तर्फ यस पटक थप कडाइ गरिएको बताएका छन् ।
निर्वाचनका दिन ७११ जना नेपाल प्रहरी, ४०८ जना नेपाली सेना, १८४ जना सशस्त्र प्रहरी र १,५८० जना निर्वाचन प्रहरी गरी कुल २,८८३ जना सुरक्षाकर्मी परिचालन गरिने छ ।
