डोटी उद्योग वाणिज्य संघमा नेतृत्वको लागि दिपक खड्काको दावी घोषणा

डोटी: उद्योग एवं व्यापार व्यवसायीहरुको साझा संस्था उद्योग वाणिज्य संघ डोटीको नेतृत्वको लागि दिपक बहादुर खड्काले नेतृत्वको दावी घोषणा गरेका छन् ।
डोटी उद्योग वाणिज्य संघका पूर्व महासचिव खड्काले सामाजिक संजाल फेसबुकमार्फत नेतृत्वमा आफ्नो दावी प्रस्तुत गरेका हुन् ।
यही भदौ २५ गते डोटी उद्योग वाणिज्य संघको चुनावी अधिवेशन हुँदैछ । संघले भदौ १८ गतेसम्म सदस्यता नविकरणको समयसीमा पनि तोकेको छ ।
अधिवेशनमार्फत नेतृत्वको दावी गरेका खड्काले आफ्नो दावीका आधार तथा आगामी योजना समेत सार्वजनिक गरेका छन् । हेर्नुहोस् खड्काको दावी र योजना सहितको प्रतिवद्धता जस्ताको त्यस्तै –

मेरो सोच, योजना र डाेटी उधाेग बाणिज्य संघकाे नेतृत्वप्रतिको प्रतिबद्धता
आदरणीय डोटी उद्योग वाणिज्य संघका सम्पूर्ण सदस्यज्यूहरू, पूर्व अध्यक्ष तथा पूर्व पदाधिकारीज्यूहरू, वर्तमान अध्यक्ष, पदाधिकारी तथा कार्यसमितिका साथीहरू, विभिन्न बस्तुगत संघका पदाधिकारीज्युहरु उद्योगी–व्यवसायी, पत्रकार मित्रहरू, विभिन्न राजनैतिक दलहरुमा आबद्ध ब्यक्तिहरु, जनप्रतिनिधि ज्युहरु , शुभेच्छुक, आफन्त तथा सम्पूर्ण डोटीवासीमा हार्दिक नमस्कार। 🙏
डोटी उद्योग वाणिज्य संघको आगामी अधिवेशन तथा साधारणसभा २०८३ साल भदौ २५ गते तय भएको सन्दर्भमा संघको आगामी नेतृत्वका लागि आफ्नो सोच, योजना र प्रतिबद्धता यहाँहरूमाझ विनम्रतापूर्वक सार्वजनिक गर्न चाहन्छु।
यो कुनै पद प्राप्त गर्ने अभियान मात्र होइन। डोटीका उद्योगी–व्यवसायीको सम्मान, हकहित, जिल्लाको आर्थिक समृद्धि तथा कृषि, पर्यटन, उद्योग र व्यापारको दिगो विकासका लागि सामूहिक रूपमा अघि बढ्ने साझा अभियान हो।
विगत लामो समयदेखि होटल, पर्यटन तथा उद्योग–व्यवसायको क्षेत्रमा सक्रिय रहँदै डोटीका सम्भावनालाई राष्ट्रिय तथा अन्तर्राष्ट्रिय स्तरमा चिनाउने प्रयास गर्दै आएको छु। खप्तड, बडीमालिका, रामारोशन, सैपाल, शैलेश्वरीलगायत धार्मिक तथा प्राकृतिक पर्यटनको प्रवर्द्धन, होमस्टे विकास, हेलिटुरिजम, पर्यटन प्याकेज निर्माण, स्थानीय उत्पादनको प्रचार–प्रसार तथा निजी क्षेत्र र सरकारी निकायबीच समन्वयका क्षेत्रमा मैले आफ्नो समय, श्रम र अनुभव समर्पित गरेको छु।
मेरो संस्थागत अनुभव
▪️ होटल व्यवसायी संघ डोटी — अध्यक्ष, २ कार्यकाल (७ वर्ष)
▪️ होटल व्यवसायी महासंघ, सुदूरपश्चिम प्रदेश — अध्यक्ष, १ कार्यकाल (३ वर्ष)
▪️ डोटी उद्योग वाणिज्य संघ — सदस्य, १ कार्यकाल (३ वर्ष)
▪️ डोटी उद्योग वाणिज्य संघ — महासचिव, १ कार्यकाल (४ वर्ष)
मेरा प्रमुख प्राथमिकता र प्रतिबद्धता

✅ व्यवसायीहरूको क्षमता अभिवृद्धिका लागि सीपमूलक तालिम, नेतृत्व विकास तथा व्यवसाय व्यवस्थापनसम्बन्धी कार्यक्रम सञ्चालन गर्ने।
✅ संघको अपूरो भवन निर्माण कार्य सम्पन्न गर्ने।
✅ कृषि, पर्यटन, उद्योग र व्यापारलाई प्राथमिकतामा राखी परिणाममुखी कार्यक्रम सञ्चालन गर्ने।
✅ व्यापार मेला, कृषि मेला, पर्यटन महोत्सव तथा स्थानीय उत्पादन प्रदर्शनीलाई नियमित बनाउने।
✅ स्थानीय उत्पादनको ब्रान्डिङ, बजारीकरण र उद्यमशीलतालाई प्रवर्द्धन गर्ने।

✅ डोटीबाट बढ्दो बसाइँसराइ न्यूनीकरणका लागि स्थानीय स्तरमै रोजगारी र उद्यमका अवसर सिर्जना गर्न पहल गर्ने।
✅ निजी क्षेत्र, स्थानीय तह, प्रदेश तथा संघीय सरकारसँग प्रभावकारी समन्वय गरी व्यवसायीका समस्या समाधानका लागि पहल गर्ने।
✅ डोटीका उद्योगी–व्यवसायीको आवाज सम्बन्धित निकायसम्म प्रभावकारी रूपमा पुर्‍याउने।
✅ संघलाई पारदर्शी, उत्तरदायी, समावेशी र सबै सदस्यको साझा संस्थाका रूपमा विकास गर्ने।

सम्पूर्ण व्यवसायी साथीहरूमा विशेष अनुरोध
डोटी उद्योग वाणिज्य संघको सदस्यता नवीकरण गर्ने अन्तिम म्याद २०८३ साल भदौ १८ गतेसम्म रहेको हुँदा सम्पूर्ण व्यवसायी सदस्यज्यूहरूलाई समयमै आफ्नो फर्म तथा सदस्यता नवीकरण गरिदिनुहुन हार्दिक अनुरोध गर्दछु।
सबल र प्रतिनिधिमूलक संघ निर्माणका लागि प्रत्येक व्यवसायी सदस्यको सहभागिता अत्यन्त महत्वपूर्ण छ।
तपाईंहरूको सुझाव र समर्थनको अपेक्षा
आदरणीय पूर्व अध्यक्ष तथा पूर्व पदाधिकारीज्यूहरू, वर्तमान पदाधिकारी तथा कार्यसमितिका साथीहरू, सम्पूर्ण सदस्यज्यूहरू, उद्योगी–व्यवसायी, शुभेच्छुक तथा डोटीवासी दाजुभाइ तथा दिदीबहिनीहरूमा मेरो विशेष आग्रह छ—
मलाई केवल व्यक्तिका रूपमा होइन, मेरो विगतको काम, अनुभव, इमानदारी, क्षमता र डोटीको उद्योग–व्यवसाय क्षेत्रप्रतिको प्रतिबद्धताका आधारमा मूल्याङ्कन गरिदिनुहोस्।
मेरा योजना र सोचमा कमी–कमजोरी देखिए निर्भीक भएर सुझाव दिनुहोस्। राम्रो लागेको छ भने साथ, समर्थन र विश्वास प्रदान गरिदिनुहोस्।
म एक्लैले केही गर्न सक्दिनँ। बलियो संस्था बनाउन बलियो, सक्षम, इमानदार, अनुभवी र सबै क्षेत्रको प्रतिनिधित्व हुने टिम आवश्यक हुन्छ। त्यसैले सबैलाई समेट्ने, सामूहिक निर्णय र साझा जिम्मेवारीमा आधारित कार्यसमिति निर्माण गर्ने मेरो प्रतिबद्धता छ।
आगामी २०८३ भदौ २५ गते हुने अधिवेशन तथा साधारणसभालाई डोटीका उद्योगी–व्यवसायीको एकता, सहकार्य र नयाँ सोचलाई संस्थागत गर्ने महत्वपूर्ण अवसरका रूपमा लिएको छु।
व्यक्तिभन्दा संस्था, स्वार्थभन्दा साझा हित, प्रतिस्पर्धाभन्दा एकता र नाराभन्दा कामलाई प्राथमिकता दिऔँ।
समृद्ध डोटी, सशक्त उद्योगी–व्यवसायी र बलियो डोटी उद्योग वाणिज्य संघ निर्माणका लागि हातेमालो गरौँ।
यहाँहरूको सल्लाह, सुझाव, साथ, समर्थन, विश्वास र अमूल्य मतको हार्दिक अपेक्षासहित। 🙏
– दीपक बहादुर खड्का
डोटी उद्योग वाणिज्य संघको नेतृत्वका लागि प्रतिबद्ध