रमेश बहादुर सिंह /बझाङः थलारा गाउँपालिकाले महिला सशक्तीकरणतर्फ महत्वपूर्ण कदम चालेको छ। पालिकाले अगुवा महिलाहरूको क्षमता अभिवृद्धि गर्न सञ्चालन गरेको तालिम हालै सम्पन्न भएको छ। तालिममा गाउँपालिकाका विभिन्न वडाबाट करिब ५० जना अगुवा महिलाहरूको सक्रिय सहभागिता रहेको थियो।
कार्यक्रमको औपचारिक उद्घाटन गर्दै गाउँपालिकाका अध्यक्ष प्रकाश रोकायाले भने,
“महिला सशक्तीकरण हाम्रो पालिकाको प्रमुख प्राथमिकता हो। गाउँस्तरमै महिलालाई सामाजिक र राजनीतिक नेतृत्वका लागि तयार पार्न यस्ता तालिमहरू आवश्यक छन्। आगामी दिनहरूमा पनि यस्ता कार्यक्रमलाई निरन्तरता दिइनेछ।”
उपाध्यक्ष राम बहादुर खातीले महिलालाई व्यवहारिक नेतृत्व, निर्णय प्रक्रियामा सहभागिता, तथा संस्थागत आवाज निर्माणका विषयमा प्रशिक्षणको महत्व स्पष्ट पारे।
“महिलाबिना विकास सम्भव छैन। नेतृत्व लिन सक्ने महिला तयार गर्नु नै दीगो विकासको आधार हो,” उनले बताए।
तालिममा कानुनी र सामाजिक ज्ञानको सुदृढीकरण
तालिमको सहजीकरणमा पत्रकार महासंघ बझाङका पूर्वअध्यक्ष जगदिश रोकाया र सहायक प्रमुख जिल्ला अधिकारी सत्य कुमारी जोशीको विशेष भूमिका रहेको थियो। उनीहरूले स्थानीय शासन, कानुनी अधिकार, लैङ्गिक समानता, मानव अधिकार, योजना निर्माण प्रक्रिया र सार्वजनिक बजेट अनुगमनका विषयमा सहभागीलाई प्रशिक्षण दिए।
सहायक प्रमुख जिल्ला अधिकारी जोशीले महिलाहरूलाई परिवर्तनका अग्रदूत बन्न प्रेरित गर्दै भनिन्,
“तपाईंहरू परिवर्तनका प्रतिनिधि बन्नुपर्छ। बोल्न, हस्तक्षेप गर्न र नेतृत्व लिन सक्ने आत्मविश्वास विकास गर्नु नै यो तालिमको मूल उद्देश्य हो।”
सहभागी महिलाको आत्मविश्वासमा वृद्धि
कार्यक्रममा सहभागी पशुपति भट्टराईले यस्ता तालिमले आफूहरूमा आत्मविश्वास र क्षमता वृद्धि गरेको बताउँदै भनिन्,
“पहिले हामी सार्वजनिक कार्यक्रममा बोल्न पनि हिच्किचाउँथ्यौँ। अब भने नेतृत्व गर्न समेत तयार छौं। यस्ता कार्यक्रमलाई नियमित गर्न गाउँपालिकासँग आग्रह गर्दछु।”
थलारा गाउँपालिकाले आगामी आर्थिक वर्षका योजनामा महिला नेतृत्व विकास, उद्यमशीलता प्रवर्द्धन र सीपमूलक तालिमहरूलाई प्राथमिकता दिने प्रतिबद्धता जनाएको छ। यस प्रकारका कार्यक्रमले स्थानीय सामाजिक संरचनामा सकारात्मक परिवर्तन ल्याउने अपेक्षा गरिएको छ।
