ओमानको बन्दरगाह सहर खसाब नजिकै भएको घटनाले मध्यपूर्वमा पुनः तनाव बढाएको छ। मेहर समाचार एजेन्सीका अनुसार अमेरिकी लडाकू जेटहरूले इरानी कार्गो तथा माछा मार्ने ६ वटा जहाजमा आक्रमण गर्दा कम्तीमा ६ जना घाइते भएका छन् भने ६ जना बेपत्ता छन्। जहाजहरू होर्मोजगन प्रान्तको बन्दर लेङ्गेह काउन्टीका गाउँलेहरूको स्वामित्वमा रहेको बताइएको छ। आक्रमणका बेला जहाजमा करिब २० जना सवार थिए र घाइतेहरूलाई तत्काल अस्पताल भर्ना गरिएको छ।
यसअघि पनि होर्मुज तटमा भएको छुट्टै घटनामा एक जनाको मृत्यु र १० जना घाइते भएको रिपोर्ट गरिएको थियो। त्यस क्रममा केही जहाजमा आगलागीसमेत भएको उल्लेख छ। पछिल्ला दिनहरूमा होर्मुज जलक्षेत्र वरपर इरान र संयुक्त राज्य अमेरिकाबीच झडप तीव्र बनेको देखिन्छ।
इरानी सैन्य कमान्डले अमेरिकी सेनाले आफ्ना जहाजमाथि आक्रमण गरेको दाबी गर्दै जवाफी कारबाही गरिएको जनाएको छ। उता अमेरिकी सेन्ट्रल कमान्डले भने इरानी आक्रमण रोक्न र आफ्ना नौसैनिक जहाजहरूको सुरक्षाका लागि आत्मरक्षामा कारबाही गरिएको दाबी गरेको छ। यस घटनाले अन्तर्राष्ट्रिय जलमार्गमा सुरक्षाको चिन्ता थप बढाएको छ र क्षेत्रीय स्थायित्वमाथि प्रश्न उठाएको छ।
