अमेरिका र इरानबीच युद्धविरामपछि रोकिएको शान्ति वार्तालाई पुनः अघि बढाउन पाकिस्तानले कूटनीतिक सक्रियता बढाएको छ। यसैक्रममा पाकिस्तानका आन्तरिक मामिलामन्त्री Mohsin Naqvi दुई दिने औपचारिक भ्रमणका लागि शनिबार तेहरान पुगेका छन्। इरानी सञ्चारमाध्यमका अनुसार क्षेत्रीय शान्ति प्रवर्द्धन गर्ने उद्देश्यसहित उनको भ्रमण भएको हो।
केही दिनअघि मात्रै पाकिस्तानका सेना प्रमुख Asim Munir ले पनि तेहरान भ्रमण गरेका थिए। इरानका गृहमन्त्री Eskandar Momeni ले नक्वीलाई स्वागत गरेका छन्।
इस्लामावादले अमेरिका र इरानबीच मध्यस्थकर्ताको भूमिका खेल्दै आएको छ। गत महिना पाकिस्तानले दुवै पक्षका प्रतिनिधिबीच उच्चस्तरीय बैठकसमेत आयोजना गरेको थियो। अप्रिल ८ देखि लागू भएको युद्धविरामले अमेरिका र इजरायलद्वारा इरानमाथि गरिएको सैन्य आक्रमणपछि चर्किएको तनावलाई केही हदसम्म रोक्न सहयोग गरेको छ।
यसबीच इरानका विदेशमन्त्री Abbas Araghchi ले अमेरिकी राष्ट्रपति Donald Trump प्रशासन वार्ताका लागि इच्छुक रहेको सन्देश तेहरानले प्राप्त गरेको बताएका छन्।
