रसुवाको भोटेकोशी नदीमा आएको भीषण बाढीबाट प्रभावित ३३६ जनाको हवाई उद्धार गरिएको छ। आज बिहानदेखि टिमुरे, धुञ्चे र मैलुङ क्षेत्रबाट ६ देशका ४५ विदेशी नागरिकसहित उनीहरूको उद्धार गरिएको हो।
नेपाली सेनाका सैनिक प्रवक्ता राजाराम बस्नेतका अनुसार करिब ४ हजार सुरक्षाकर्मीको समन्वयमा घाइतेको खोज तथा उद्धार, आपत्कालीन उपचार र राहत वितरण भइरहेको छ। टिमुरे क्षेत्रमा सम्पर्कविहीन रहेका २१ भारतीय पर्यटकको पनि उद्धार गरी काठमाडौं ल्याउने तयारी भइरहेको सेनाले जनाएको छ।
सरकारले प्रभावित तथा नदी तटीय क्षेत्रमा खोज, उद्धार र राहत कार्यलाई तीव्र बनाएको छ। जोखिममा रहेका नागरिकका लागि सेनाले बुधबार रातिदेखि नै खाद्य सामग्री, टेन्ट र औषधिलगायत राहत सामग्री प्रभावित क्षेत्रमा पुर्याएको जनाएको छ।
उद्धार तथा खोजी कार्यमा नेपाली सेना, अन्य सुरक्षा निकाय, निजी क्षेत्रका हेलिकप्टर तथा पैदल टोली परिचालन गरिएको छ। टिमुरे, स्याफ्रुबेँसी र नदी तटीय क्षेत्रमा फसेका नागरिकको उद्धार तथा बेपत्ताको खोजी जारी छ।
सरकारले नदी किनारका बासिन्दालाई उच्च सतर्कता अपनाउन आग्रह गर्दै सबै सरकारी संयन्त्रलाई राहत, उद्धार र खोजी कार्यमा केन्द्रित गरेको जनाएको छ।
