चीन–नेपाल सीमा क्षेत्रमा विनाशकारी पहिरोपछि बनेको ताल फुटेर थप बाढी आउन सक्ने जोखिम बढेपछि चीनले तिब्बतमा जारी खोज तथा उद्धार अभियान अस्थायी रूपमा स्थगित गरेको छ। चिनियाँ सरकारी सञ्चारमाध्यमका अनुसार उद्धार टोलीलाई घटनास्थलबाट कम्तीमा एक किलोमिटर टाढा सुरक्षित स्थानमा हट्न निर्देशन दिइएको छ।
तिब्बतको सीमावर्ती केरुङ क्षेत्रमा बुधबार ठूलो पहिरो खसेपछि माटो, लेदो र भग्नावशेष थुप्रिएर ताल बनेको थियो। निरन्तर वर्षा भइरहेकाले तालको जलस्तर अझै बढ्ने र भदौ १६ (सेप्टेम्बर १) आसपास उच्च बिन्दुमा पुग्ने अनुमान गरिएको छ। ताल फुटेमा केरुङ बन्दरगाहसहित तल्लो तटीय क्षेत्रमा थप बाढी र क्षति हुनसक्ने चिनियाँ अधिकारीहरूले चेतावनी दिएका छन्।
चिनियाँ राज्य सञ्चालित प्रसारक सीसीटीभीका अनुसार सबै उद्धार टोलीलाई सुरक्षित स्थानमा तयारी अवस्थामा रहन र थप निर्देशनको प्रतीक्षा गर्न भनिएको छ। आपत्कालीन इन्जिनियरिङ टोलीले तालको अवस्था निरन्तर निगरानी गरिरहेको छ।
शुक्रबारसम्म प्रकोप प्रभावित क्षेत्रबाट ४९९ चिनियाँ नागरिक र ५५५ विदेशी नागरिकलाई सुरक्षित स्थानमा सारिएको बताइएको छ। यद्यपि, पहिरोमा परी अझै सयौँ मानिस सम्पर्कविहीन रहेको जनाइएको छ।
बेपत्ता व्यक्तिको खोजीका लागि उद्धारकर्मीले ड्रोनमार्फत थ्रीडी मोडलिङ, थर्मल इमेजिङ तथा प्रत्यक्ष खोजी प्रविधि प्रयोग गरिरहेका छन्। जोखिम उच्च रहेकाले उद्धार टोलीले सुरक्षालाई प्राथमिकतामा राख्दै परिस्थितिको मूल्याङ्कनपछि मात्रै पुनः अभियान सञ्चालन गर्ने तयारी गरेको छ।
