बाजुरामा मङ्सिर, पुस, र माघको कठ्याङ्ग्रिँदो चिसोले जनजीवन कष्टकर बनाएको छ। हिमाली क्षेत्रमा बाक्लो हिमपातका कारण अझै चिसो बढेको छ, जसले विद्यार्थीहरूको पठनपाठनमा गम्भीर प्रभाव पारेको छ। यद्यपि, बुढीनन्दा नगरपालिकाको सिद्धेश्वरी अनाथ विपन्न तथा जनजाति आवासीय विद्यालयमा शिक्षिका जुना रावतको समर्पणले उदाहरण प्रस्तुत गरेको छ।
चिसो हिउँदमा जुना रावत आफ्नो पाँच महिने शिशुलाई पिठ्यूँमा बोकेर विद्यार्थीलाई शिक्षादान गरिरहेकी छन्। कठ्याङ्ग्रिँदो चिसो र बाहिरको बाक्लो हिमपातका बीच उनले विद्यार्थीहरूको पठनपाठन अवरुद्ध हुन नदिई निरन्तरता दिइरहेकी छन्।
यो विद्यालय बाजुराको एक मात्र जनजातिको विद्यालय हो, जहाँ मुख्यतः भोटे समुदायका विद्यार्थीहरू अध्ययन गर्छन्।
१० जना टुहुरा, १ जना अनाथ
१५ जना जनजाति, द्वन्द्वपीडित, र दलित
४० जना भोटे समुदायका गरी कुल ६६ विद्यार्थी
विगतमा हिउँदको चिसोले विद्यालय बन्द हुने गथ्र्यो। तर, पछिल्लो समय विद्यालय हिउँद र वर्षा दुवै मौसममा नियमित सञ्चालन हुँदै आएको छ।
विद्यालयमै बसेर अध्ययन गर्न थालेपछि विशेषतः भोटे समुदायका विद्यार्थीहरूको पढाइमा सुधार आएको प्रधानाध्यापक तुलाबहादुर रावतले बताए। जनजाति, दलित, र हलियाका टुहुरा बालबालिकाहरूलाई विद्यालयमै राखेर शिक्षा प्रदान गरिएको छ।
जुना रावतको समर्पण र विद्यालयको निरन्तरता बाजुराका हिमाली क्षेत्रमा शिक्षा प्रवाहको प्रेरणादायी उदाहरण बनेको छ। चिसोको प्रभावलाई चुनौती दिँदै शिक्षिकाहरूको योगदानले विद्यार्थीहरूको भविष्यमा सकारात्मक परिवर्तन ल्याइरहेको छ।
