बाजुरा: भौगोलिक रूपमा निकै दुर्गम र कठिन रहेको बाजुराका गाउँहरूमा नेपाल टेलिकमले फोरजी सेवा विस्तार गरेको छ। फोनसमेत गर्न कठिनाइ हुने हिमाली गाउँपालिकाका गाउँहरूमा फोरजी सेवा सञ्चालनमा आएपछि स्थानीय खुसी भएका छन्।
पहिले फोनका लागि डाँडा र रुख खोज्नुपर्ने अवस्था
हिमाली गाउँपालिका–६ पाडीमा केही समयअघिसम्म सामान्य फोन सेवासमेत उपलब्ध थिएन। फोन गर्न डाँडा चढ्नुपर्ने र अग्ला रुख खोज्नुपर्ने बाध्यता थियो। अहिले भने नेपाल टेलिकमले भरपर्दो फोरजी इन्टरनेट सेवा सञ्चालनमा ल्याएपछि घरमै बसेर आरामले कुरा गर्न सकिने भएको छ।
फोरजी सेवाले ल्याएको परिवर्तन
फोरजी सेवाको सञ्चालनले स्थानीयहरूले विकास गाउँमै आइपुगेको महसुस गरेका छन्। इन्टरनेट सेवा सुरु भएसँगै फोटो र भिडियो आदान-प्रदान गर्न सकिने सुविधा पाएकोमा स्थानीय उत्साहित भएका छन्।
गाउँपालिकाको सफलता
हिमाली गाउँपालिकाका प्रमुख प्रशासकीय अधिकृत राज भण्डारीका अनुसार प्रत्येक वडामा फोरजी सेवा जडान गर्ने लक्ष्य पूरा भएको छ। उनले भने, “भूगोल र दुर्गमताका कारण विकासको अनुभूति गराउन कठिनाइ भए पनि फोरजी सेवा विस्तारले ठूलो उपलब्धि हासिल गरेको छ।”
हिमाली गाउँपालिकाको अवस्था
देशकै विकट पालिकामध्ये एक हिमाली गाउँपालिका विकासका आधारभूत सुविधाबाट वञ्चित रहँदै आएको थियो। साविक बिच्छ्या र रुगीन गाउँ विकास समितिअन्तर्गतका वडाहरू दूरी र विकासको हिसाबले निकै पछाडि थिए। फोरजी सेवाको विस्तारले यी क्षेत्रमा शिक्षा, स्वास्थ्य र सञ्चारजस्ता क्षेत्रमा ठूलो फाइदा पुर्याउने अपेक्षा गरिएको छ।
दीर्घकालीन प्रयासपछि सम्भव भएको सेवा
गाउँपालिकाले विगत पाँच वर्षदेखि नेपाल टेलिकमसँग निरन्तर समन्वय गर्दै आएको थियो। त्यसकै परिणामस्वरूप गत वैशाखदेखि पाडीमा टावर निर्माण सुरु गरिएको थियो।
“पहिले फोन गर्नसमेत समस्या हुने ठाउँमा अहिले फोरजी सेवासहित इन्टरनेट चलाउन पाउँदा हामीलाई विकासको आभास भएको छ,” स्थानीय राज बहादुर थापाले बताए।
विकासको मार्गमा हिमाली गाउँपालिका
गाउँपालिकाका अध्यक्ष गोविन्द्र बहादुर मल्लका अनुसार विद्युत्, शिक्षा, स्वास्थ्य, खानेपानी, सडक, र सञ्चारजस्ता विकासका अन्य पहलहरूमा पनि काम भइरहेको छ। “फोरजी सेवाले हिमाली गाउँपालिकामा सञ्चारका माध्यमबाट विकासलाई नयाँ गति दिएको छ,” उनले थपे।
यो सेवाको विस्तारले दुर्गम गाउँहरूलाई मुख्य प्रवाहमा ल्याउने र स्थानीयको जीवनस्तर सुधार्न ठूलो योगदान पुर्याउने विश्वास गरिएको छ।
रेडियो नेपलबाट बाट लिएका अंशलाई सम्पदन गरिएको ।
