अत्तरिया: गोदावरी नगरपालिका–१ ले आर्थिक वर्ष २०८२/८३ का लागि १ करोड २० लाख रुपैयाँको वार्षिक बजेट सार्वजनिक गरेको छ। वडा भेला मार्फत सार्वजनिक गरिएको बजेटमा भौतिक पूर्वाधार, शिक्षा, स्वास्थ्य, खानेपानी र सीपमूलक तालिममा विशेष प्राथमिकता दिइएको छ।
वडाले टोलटोलमा पुगेर स्थानीय बासिन्दाका सुझाव, माग र आवश्यकताको आधारमा बजेटको खाका तयार पारेको हो। वडाध्यक्ष तथा गोदावरी नगरपालिकाका प्रवक्ता गोपाल दत्त भट्टको नेतृत्वमा बजेट तर्जुमा गरिएको हो।
नगर प्रमुख वीरेन्द्र भट्टको प्रमुख आतिथ्यतामा सम्पन्न नवौं वडा भेलामा नागरिकहरूको उल्लेखनीय सहभागिता रहनु स्थानीय तहप्रतिको विश्वासको संकेतका रूपमा हेरिएको छ। वडाले प्रस्तुत गरेको योजनामा पारदर्शिता, सहभागिता र जनउत्तरदायित्वलाई केन्द्रमा राखिएको जनाइएको छ।
आगामी आर्थिक वर्षको नीति तथा कार्यक्रम प्रस्तुत वडाध्यक्ष गोपाल दत्त भट्टले गरेका छन्। १ नं वडामा बजेट सिलिङ आ व ०८२\०८३ को लागी १ करोड २० लाख ९७ हजार ९ सय ९२ रुपैयाँ बजेट प्राप्त भएको छ। जसमा समानीकरण ७० लाख र सूत्रमा आधारित बजेट ५० लाख ९७ हजार ९ सय ९२ रुपैयाँ रहेको छ।
पूर्वाधार विकास तर्फ ८० लाख, सामजिक विकास तर्फ १५ लाख ५९ हजार,आर्थिक विकास तर्फ १३ लाख ३० हजार, बन तथा वातावरण क्षेत्र तर्फ १ लाख ५० हजार र सुशासन तथा संस्थागत विकास तर्फ १० लाख ६७ हजार ९ सय ९२ रुपैयाँ बजेट विनियोजन गरिएको छ ।
वडाले टोलटोलमा पुगेर स्थानीय बासिन्दाका सुझाव, माग र आवश्यकताको आधारमा बजेटको खाका तयार पार्नुका साथै योजना छनोट गरिएको वडा अध्यक्ष गोपालदत्त भट्टले बताए ।
नगर प्रमुख विरेन्द्र भट्टको प्रमुख आतिथ्यतामा सम्पन्न भएको नवौं वडा भेलामा विभिन्न संघ संस्थाका प्रतिनिधि, राजनितिक दलका प्रतिनिधि, विभिन्न वडाका वडा अध्यक्षहरु, कार्यपालिका सदस्यहरु, वडाबासी लगायत सञ्चाकर्मीहरुको उपस्थिति रहेको थियो ।
