डोटी: जिल्लाको पूर्वीचौकी गाउँपालिका–२ बगलेक वाडीमा सोमबार साँझ चट्याङ लाग्दा एक महिलाको मृत्यु भएको छ भने अर्की स्वास्थ्यकर्मी घाइते भएकी छन्।
चट्याङ लागेर घाइते भएकी ४० वर्षीया देउमती साउदलाई उपचारका लागि जिल्ला अस्पताल डोटी पुर्याइए पनि चिकित्सकले मृत घोषणा गरेका हुन्। चट्याङले उनको पेट र अनुहारमा गम्भीर चोट पुर्याएको थियो।
त्यस्तै, बगलेक स्वास्थ्य चौकीमा कार्यरत ३६ वर्षीया अनमी अस्मिता ओली विष्ट पनि चट्याङ लागेर घाइते भएकी छन्। उनको दायाँ पाखुरामा चोट लागेको र अवस्था मध्यम रहेको अस्पताल स्रोतले जनाएको छ। हाल उनको जिल्ला अस्पताल डोटीमै उपचार भइरहेको छ।
