संयुक्त राज्य अमेरिकाले नेपाली नागरिकलाई दिँदै आएको टेम्पोररी प्रोटेक्टेड स्टाटस (टीपीएस) सुविधा ५ अगस्ट २०२५ बाट खारेज गर्ने निर्णय गरेको छ। अमेरिकी गृह सुरक्षा विभागले नेपालमा टीपीएसका लागि आवश्यक कानुनी अवस्था नरहेको ठहर गर्दै यो निर्णय लिएको हो।
यससँगै टीपीएसमा रहेका करिब ७ हजार नेपालीलाई वैकल्पिक कानुनी आधार नभए स्वदेश फर्किनुपर्ने भएको छ। सन् २०१५ मा नेपालमा आएको भूकम्पपछि अमेरिकाले अस्थायी राहतस्वरूप नेपालीलाई टीपीएस सुविधा दिएको थियो, जसअन्तर्गत उनीहरूलाई काम गर्ने, बस्ने र सीमित यात्राको अनुमति थियो।
अहिले अमेरिकामा रहेका टीपीएसधारी नेपालीले स्वदेश फर्कन सीबीपी मोबाइल एप प्रयोग गर्नुपर्नेछ। यसअघि पनि ट्रम्प प्रशासनले टीपीएस खारेज गर्ने प्रयास गरेको थियो।
टीपीएस स्थायी बसोबास होइन; यो विशेष परिस्थितिमा अस्थायी सुरक्षा दिने सुविधा मात्र हो। अमेरिकी सरकारको निर्णयसँगै नेपाल फर्कन तयारी गर्न विज्ञहरूले आग्रह गरेका छन्।
