डोटीमा किसानहरूको आधुनिक कृषि यन्त्रप्रतिको आकर्षण बढ्दै गएको छ। खेत जोत्न, धान–गहुँ चुट्नजस्ता कार्यमा हाते ट्र्याक्टर र थ्रेसरको प्रयोग तीव्र रूपमा बढेको हो। परम्परागत गोरु पाल्ने प्रथा घट्दै जाँदा र खेतालाको अभाव बढेसँगै ट्र्याक्टर विकल्पको रूपमा देखिएको कृषि ज्ञान केन्द्र डोटीका प्रमुख गंगा दत्त अवस्थीले जानकारी दिए।
दिपायल–५ का किसान जगत विष्ट र मुकुन्द नेगीका अनुसार ट्र्याक्टरको प्रयोगले खेत जोत्न सहज, चाँडो र सस्तो भएको छ। गोरु र खेतालाको पर्खाइ हटेपछि बाँझो जमिनमा पुनः खेती हुन थालेको उनीहरूको अनुभव छ।
संघसंस्थाहरूले पनि किसानलाई यस्ता उपकरण वितरण गरिरहेका छन्। प्रमुख अवस्थीका अनुसार यन्त्रको प्रयोगले एकातिर कृषकलाई सजिलो भएको छ भने अर्कोतिर उत्पादन लागत पनि घट्दै गएको छ। यसले कृषिलाई व्यावसायिक र प्रविधिमैत्री बनाउन सघाएको छ।
