भारतको दक्षिणी राज्य तेलङ्गानामा रहेको एक औषधी कारखानामा सोमबार भएको विस्फोट र आगलागीमा कम्तीमा ३६ जनाको मृत्यु भएको छ भने झन्डै तीन दर्जन घाइते भएका छन्।
राज्यको राजधानी हैदराबादबाट करिब ५० किलोमिटर टाढा रहेको औद्योगिक क्षेत्रको उक्त कारखानामा स्प्रे ड्रायर युनिटमा अचानक विस्फोट भएपछि ठूलो आगलागी भएको हो।
राज्यका दमकल सेवा निर्देशक जीभी नारायण रावका अनुसार घटनास्थलबाट ३४ कामदारका जलेका शव फेला पारिएको छ भने अन्य दुई घाइतेको अस्पतालमा मृत्यु भएको पुष्टि भएको छ।
अहिलेसम्म करिब तीन दर्जन घाइतेलाई अस्पतालमा भर्ना गरिएको र आगलागीको कारणबारे अनुसन्धान भइरहेको अधिकारीहरूले जनाएका छन्।
