सुदूरपश्चिम प्रदेशमा पछिल्ला वर्षको तुलनामा चालु आर्थिक वर्षमा सवारी दुर्घटनाको संख्या उल्लेखनीय रूपमा बढेको छ। ट्राफिक व्यवस्थापन कार्यालय अत्तरियाका अनुसार २०७९/८० मा २५२ र २०८०/८१ मा ३०९ सवारी दुर्घटना भए पनि २०८१/८२ मा यो संख्या एकाएक बढेर १,१५३ पुगेको छ।
दुर्घटनाबाट मृत्यु र घाइते हुनेको संख्या पनि बढ्दो छ। २०७९/८० मा १७७ जनाको मृत्यु र ४७३ घाइते, २०८०/८१ मा १७२ जनाको मृत्यु र ५३६ घाइते भएका थिए। तर २०८१/८२ मा १८५ जनाको मृत्यु र १,९३६ जना घाइते भएको तथ्यांकमा उल्लेख छ।
ट्राफिक डिएसपी टेकबहादुर जोराका अनुसार, अधिकांश दुर्घटना मोटरसाइकल र स्कुटी जस्ता दुईपांग्रे सवारीसँग सम्बन्धित छन्। विशेषगरी तराईका कैलाली र कञ्चनपुरमा दुर्घटनाको संख्या बढी रहेको छ। पहाडी जिल्लामा ठूला सवारी दुर्घटना घटेको भए पनि साना सवारी र रातिमा लागू औषध सेवन गरी तीव्र गतिमा चलाउने प्रवृत्तिले दुर्घटना बढाएको बताइएको छ।
सवारी दुर्घटनामा कारबाही गर्दै ट्राफिक प्रहरीले चालु आर्थिक वर्षमा ४ करोड २५ लाखभन्दा बढी राजश्व संकलन गरेको छ। दुर्घटना न्यूनीकरणका लागि लिडार स्पीड गन प्रयोग, लागू औषध परीक्षण, जनचेतनामूलक कार्यक्रम र स्कुल सम्पर्क अभियान सञ्चालन गरिएको छ। राजमार्गमा छाडा चौपायाको व्यवस्थापन समेत चुनौतीका रूपमा रहेको ट्राफिक कार्यालयको निष्कर्ष छ।
