अमेरिकाको ओमाहाबाट डेट्रोइट जाँदै गरेको डेल्टा कनेक्सनको उडान ३६१२ मा एक यात्रुले उडानका क्रममा आपतकालीन ढोका खोल्न खोजेपछि विमानलाई सिडर र्यापिड्स, आयोवामा आपतकालीन अवतरण गराइएको छ।
२३ वर्षीय मारियो निकप्रेलज नामका ती यात्रीले ढोका खोल्ने प्रयास गर्दै एक उडान परिचारिकालाई धकेलेका र मार्ने धम्की दिएको पाइलटले एयर ट्राफिक कन्ट्रोललाई जानकारी दिएका थिए। विमानमा ६७ यात्रु र ४ चालक दल सदस्य सवार थिए।
सौभाग्यवश, कसैलाई चोटपटक नलागेको पाइलटले बताएका छन्। विमान सुरक्षित अवतरणपछि प्रहरीले ती यात्रुलाई नियन्त्रणमा लिएको छ।
घटनाको भिडियो सामाजिक सञ्जालमा भाइरल बनेको छ, जहाँ युवकलाई हात बाँधिएको अवस्थामा प्रहरीले विमानबाट निकालिरहेको देखिन्छ। यो घटना बिहीबार साँझ करिब ७ बजे भएको हो।
