पूर्व अमेरिकी राष्ट्रपति डोनाल्ड ट्रम्पले भारतबाट आयात हुने सबै वस्तुमा कुल ५० प्रतिशत भन्सार महसुल लगाउने निर्णय गरेका छन्। ट्रम्पले यसअघि जुलाई ३१ मा २५ प्रतिशत महसुल घोषणा गरिसकेका थिए भने अब थप २५ प्रतिशत थप गर्दै कुल महसुल ५० प्रतिशत पुर्याउने निर्णय गरेका हुन्।
ट्रम्प प्रशासनका अनुसार यो निर्णय कार्यान्वयनमा आउन करिब २१ दिन लाग्नेछ। अमेरिकी पक्षले भारतले अझै पनि रूसबाट तेल आयात गरिरहेकाले यस्तो कदम चालिएको स्पष्ट पारेको छ।
“रूसको तेल निरन्तर किनिरहेको भारतबाट हुने आयातमा थप महसुल लगाउन आवश्यक र उचित ठान्दछु,” ट्रम्पको कार्यकारी आदेशमा उल्लेख गरिएको छ।
भारतको कडा प्रतिक्रिया
अमेरिकाको निर्णयप्रति भारतले तीव्र आपत्ति जनाएको छ। भारतको विदेश मन्त्रालयले उक्त कदमलाई “अनुचित, अकारण र तर्कहीन” भन्दै विरोध जनाएको छ।
भारतले आरोप लगाएको छ कि अमेरिका र युरोपेली मुलुकहरूले पनि रूससँग अरबौं डलरको तेल तथा अन्य व्यापार गरिरहेका छन्, तर कारवाहीको निशानामा भने भारत मात्र परेको छ।
चीन, युरोप र अमेरिका स्वयं पनि रूसी व्यापारमा
विश्लेषकहरूका अनुसार चीन, युरोप र अमेरिका स्वयंले पनि रूससँग ठूलो परिमाणमा तेल तथा अन्य सामग्री आयात गरिरहेका छन्, तर उनीहरूलाई यस्तो कठोर निर्णयबाट जोगाइएको छ।
पुटिनसँगको भेटपछि निर्णय
यो निर्णय ट्रम्पका विशेष दूत स्टीव विटकॉफ़ र रुसी राष्ट्रपति भ्लादिमिर पुटिनबीचको भेटपछि आएको हो। विश्लेषकहरूले अनुमान गरेका छन् कि यस निर्णयले भारत–अमेरिका व्यापारिक सम्बन्धमा थप तनाव निम्त्याउने सम्भावना बलियो बनेको छ।
