कैलालीको घोडाघोडी नगरपालिका–७ की २१ वर्षीया आरतीकुमारी डगौरा र उनकी १० महिनाकी छोरी अनुजा चौधरी मृत फेला परेका छन्।
इलाका प्रहरी कार्यालय सुखडका डिएस्पी रमेशदत्त अवस्थीका अनुसार उनीहरू शनिबार घर नजिकै रहेको गौरीशंकर सामुदायिक वनमा रूखमा झुन्डिएको अवस्थामा भेटिएका हुन्। आमाछोरी एउटै रूखमा फरक–फरक पासोमा झुन्डिएको अवस्थामा फेला परेका थिए।
डगौरा छोरीसहित साउन २९ गतेदेखि बेपत्ता भएको परिवारले प्रहरीलाई जानकारी दिएको थियो। खोजीको क्रममा उनीहरू शनिबार मृत भेटिएका हुन्। शवलाई परीक्षणका लागि टीकापुर अस्पतालमा राखिएको प्रहरीले जनाएको छ।
डगौरा श्रीमान्, सासू र देवरदेउरानीसँगै घरमा बस्दै आएकी थिइन्। घटनाबारे थप अनुसन्धान भइरहेको प्रहरीले जनाएको छ।
