अछामः अछामको सान्फेबगरमा रहेको बयालपाटा अस्पताल दुर्गम तथा विपन्न समुदायका लागि जीवनरक्षक स्वास्थ्य संस्थान बनेको छ। जनशक्ति अभाव, आर्थिक संकट र लजिस्टिक समस्याका बाबजुद यो अस्पतालले गुणस्तरीय र निःशुल्क स्वास्थ्य सेवा निरन्तरता दिँदै आएको छ। हालै सुदूरपश्चिम प्रदेश सरकारले यसलाई आफ्नो स्वामित्वमा लिएपछि नयाँ सम्भावनाको ढोका खुलेको छ।
सन् २००९ मा न्याया हेल्थ नेपाल र नेपाल सरकारको साझेदारीमा स्थापना भएको बयालपाटा अस्पताल वातावरणमैत्री भवनका लागि अन्तर्राष्ट्रिय स्तरमै चर्चित छ। ७.५ एकड क्षेत्रमा फैलिएको यो अस्पताल सौर्य ऊर्जा, जलवायु नियन्त्रण प्रणालीसहितको अत्याधुनिक संरचना हो। वार्षिक १ लाखभन्दा बढी बिरामी उपचार गर्ने यस अस्पतालले १३ लाखभन्दा बढी बिरामीलाई सेवा प्रदान गरिसकेको छ। निःशुल्क सेवामा सिजरियन सेक्सन, आकस्मिक शल्यक्रिया, हाडजोर्नी उपचार, मानसिक स्वास्थ्य, प्रसूति, प्रयोगशाला, एक्स–रे र अल्ट्रासाउन्ड प्रमुख छन्।
चुनौतीबीच दातृ सहयोग घट्दा केही सेवा बन्द गर्नुपरेको थियो। तर, प्रादेशिक स्वामित्वमा आएपछि डा. जगदिश जोशीको नेतृत्वमा सिजरियन, शल्यक्रिया र मानसिक स्वास्थ्यजस्ता सेवा पुनः सुचारु भएका छन्। सामुदायिक स्वास्थ्य कार्यक्रममार्फत १ लाख २० हजारभन्दा बढी घरधुरीलाई प्रत्यक्ष लाभ मिलेको छ।
प्रदेश सरकारले जनशक्ति, औषधि आपूर्ति र पूर्वाधार विस्तारमा लगानी गर्ने तयारी गरेको छ। यसले बयालपाटालाई सुदूरपश्चिमको स्वास्थ्य सेवाको मेरुदण्डमा परिणत गर्ने अपेक्षा गरिएको छ।
