सुदूरपश्चिम प्रदेशमा आज गौरापर्वको मुख्य दिन, दुर्वाष्टमी अर्थात् अठ्यावाली मनाइँदैछ। हिजो साँझ गौराघरमा भित्र्याइएको गौरालाई आज बर्तालु महिलाले गौराखलामा लगेर पूजा गर्ने चलन छ। महिलाहरू दिनभरि बिरुडासहित गौरादेवीको पूजा गर्छन् र हिजो चढाइएको अभिमन्त्रित दुबधागो धारण गर्छन्।
गौराघरबाट गौरालाई सिङ्गारेर गौराखलामा लगिन्छ र महिलाहरू सामूहिक रूपमा अठ्यावाली गाउँदै पूजा गर्छन्। पूजा क्रममा गौराको उत्पत्ति र महेश्वरसँगको विवाहको प्रसङ्ग फागमार्फत सुनाइन्छ। प्रमुख प्रसादको रूपमा बिरुडाले श्रीमान्, छोराछोरी र आफन्तजनको दीर्घायुको कामना गर्दै टाउको पुजिन्छ। पुरुषहरूले ठाडोखेल, ढुस्को धमारीजस्ता ऐतिहासिक खेलहरू खेल्छन्।
महिलाहरूले आफ्नो सौभाग्य, समृद्धि र परिवारको सुख-शान्तिका लागि व्रत बसेर पूजा गर्ने प्रचलन छ। सुदूरपश्चिमेलीहरूले यस पर्वलाई दसैँभन्दा बढी महत्वका साथ मनाउने गरेका छन्। परदेशमा रहेका धेरैले पनि पर्वमा घर फर्कन्छन्, र विवाहित छोरीहरू माइत आउँछन्। पर्वका अवसरमा प्रदेशमा आइतवार र सोमबार सार्वजनिक बिदा समेत राखिएको छ।
