🇺🇸 विद्यार्थीका लागि अमेरिकाको नयाँ नियम : बसाइँ ४ वर्षमै सीमित, भिसा शुल्क बढ्दै

सुदूरखबर संवाददाता २०८२ भाद्र २३, सोमबार ०६:५७

मिनेट283जना

अमेरिकाले आप्रवासी विद्यार्थीका लागि थप कडाइ गर्ने तयारी गरेको छ। हालै सार्वजनिक गरिएको मस्यौदा अनुसार अब विद्यार्थीको बसाइँ अधिकतम ४ वर्षमै सीमित हुनेछ। अहिलेसम्म विद्यार्थीले पढाइ नसकिएसम्म समय थप गर्न पाउँथे, तर अब बसाइँ लम्ब्याउने प्रक्रिया जटिल र शर्तसहित हुनेछ।

नयाँ नियमअनुसार विद्यार्थीले विषय वा कलेज परिवर्तन गर्न कम्तीमा पहिलो वर्ष पूरा गरेपछि मात्र पाउनेछन्। स्नातकोत्तर तहमा भने कोर्ष परिवर्तन गर्न नपाइने व्यवस्था आउँदैछ। उस्तै वा तल्लो तहमा अध्ययन परिवर्तन पूर्ण रूपमा रोक लगाइनेछ।

अमेरिका प्रवेशपछि पढाइ वा तालिम सकिँदा विद्यार्थीलाई देश छाड्न दिइने समय ६० दिनबाट घटाएर ३० दिन बनाइएको छ। भाषाको तालिम लिने विद्यार्थीको बसाइँ अधिकतम २४ महिना मात्र हुनेछ। आर्थिक संकटजस्ता विश्वासिलो आधार देखाएमा विद्यार्थीले बसाइँ थप्न निवेदन दिन सक्नेछन्, जसको अवधिमा अधिकतम २४० दिनसम्म काम गर्न पाउने व्यवस्था छ।

विद्यार्थी भिसासँगै पत्रकार र एक्सचेन्ज प्रोग्राममार्फत अमेरिका पुगेकाहरूलाई पनि २४० दिनमै सीमित गरिनेछ। नयाँ नियमले एउटै तहमा दोहोर्याएर पढ्ने अभ्यास पनि अन्त्य गर्नेछ।

अक्टोबरदेखि भिसा पारदर्शिता शुल्क बढेर २५० डलर पुग्नेछ, जसले कुल भिसा शुल्क झण्डै ४४२ डलर पुर्‍याउनेछ। त्यस्तै, अब भिसा प्रक्रियामा दूतावास अन्तर्वार्ता अनिवार्य हुनेछ।

नयाँ नीति लागू भएपछि भिसा उल्लंघन गर्नेहरूलाई ३ देखि १० वर्षसम्म अमेरिका प्रवेशमा रोक लगाइनेछ। कानुन व्यवसायी वासु फुलाराका अनुसार, “यो कडाइ निषेध होइन, तर विद्यार्थीले आफ्नो योजना स्पष्ट राखी कानुनी बाटो अपनाउन जरुरी छ।”