कैलालीको भुमिसुधार तथा मालपोत कार्यालय गत भदौ २४ गतेको आन्दोलनमा आगजनी र तोडफोडमा परेको थियो। जेनजी आन्दोलनका क्रममा कार्यालयका २५ कम्प्युटर सेट, कुर्सी, टेबल जलेर नष्ट भएका छन् भने केही कम्प्युटर चोरीसमेत भएका छन्। कार्यालय प्रमुख प्रेम बहादुर दौल्यालका अनुसार, कार्यालयको विद्युत् र इन्टरनेट सेवा ठप्प भएको छ र केही महत्वपूर्ण कागजात पूर्ण रूपमा नष्ट भएका छन्।
अहिले कार्यालयले प्राथमिकताका आधारमा सरसफाइ र मर्मतकार्य तीव्र रूपमा अघि बढाएको छ। विद्युत् प्रणाली र नयाँ कम्प्युटर उपलब्ध भएपछि सेवा पूर्ण रूपमा सुचारु गरिनेछ। दौल्यालले चोरी भएका सामान फिर्ता गर्नसमेत अनुरोध गरेका छन्।
आन्दोलनपछि नयाँ प्रधानमन्त्री चयनसँगै कैलालीका मालपोत, नापी, यातायात लगायतका कार्यालयहरूले क्रमशः मर्मत र सफाइ गरेर आवश्यक सेवा पुनः सञ्चालनमा ल्याउने तयारी थालेका छन्।
