कैलाली क्षेत्र नम्बर २ मा नेकपा एमालेका उम्मेदवार सूर्य बहादुर थापालाई सघाउने गरी प्रगतिशील लोकतान्त्रिक पार्टीका उम्मेदवार डम्बर बहादुर रावल पछाडी सरेका छन्।
आज कैलाली क्षेत्र नम्बर २ मा दुई पार्टीबीच भएको सहमतिमा प्रत्यक्ष निर्वाचनमा एमालेका उम्मेदवार थापालाई सघाउने गरी प्रलोका उम्मेदवार निष्क्रिय भएको उल्लेख गरिएको छ। सहमति पत्रमा प्रत्यक्षमा एमालेलाई साथ दिने र समानुपातिकतर्फ आ–आफ्नो चुनाव चिन्हलाई मत माग्ने उल्लेख गरिएको छ।
सहमति पत्र हस्ताक्षर कार्यक्रममा प्रगतिशील लोकतान्त्रिक पार्टीका केन्द्रीय सदस्य तथा संविधानसभा सदस्य भगत बडूवालले पार्टी नेता–कार्यकर्ताहरूको भावना अनुसार निर्णय गरिएको बताए।
‘देश गम्भीर मोडमा छ। विद्रोहपछि सल्बलाएका शक्तिहरूले देशको अस्मितामाथि नै खतरा उत्पन्न गर्ने भएकाले हामी संविधान र देशको रक्षा गर्नुपर्छ भन्ने सोचेर हामी यो निर्णयमा पुगेका हौँ,’ बडूवालले भनेका थिए। एमाले केन्द्रीय सदस्य तथा कैलाली इन्चार्ज लीला भण्डारीले आजको घोषणा कार्यक्रमले कैलाली क्षेत्र नम्बर २ मा एमालेको जित सुनिश्चित भएको बताइन् ।
‘देश र संविधान जोगाउनका लागि आजको घोषणा सभा निकै महत्वपूर्ण भएको छ। यसले एमालेको जित सुनिश्चित भएको छ,’ उनले भनिन्, ‘देश जोगाउन एमालेको जित आवश्यक छ। देशैभर यसैगरी एमालेका उम्मेदवारहरूलाई जिताउन आवश्यक छ।’
एमालेका सबै नेता–कार्यकर्ताको प्रयत्न र प्रगतिशील लोकतान्त्रिक पार्टीको सकारात्मक सोचले यो उपलब्धि हासिल गरेको उनले बताइन्। उम्मेदवारी निष्क्रिय गरिसकेपछि प्रलोका उम्मेदवार रावलले कैलाली क्षेत्र नम्बर २ को विकासका लागि सधैँ सहकार्य गर्ने बताएका थिए।
उनले समान विचार भएका उम्मेदवारहरूलाई पनि हातेमालो गर्न अपिल गरेका थिए। प्रलोका उम्मेदवारले नै सघाउने सहमति गरेपछि एमाले उम्मेदवार सूर्य बहादुर थापाले आफ्नो जित अझै सुनिश्चित भएको बताएका थिए। उनले देश विकास र समृद्धिका लागि फुटेर नभई जुटेर अघि बढ्न सबैलाई आह्वान गरेका थिए।
