दक्षिण लेबनानमा शुक्रबार राति भएको इजरायली हवाई आक्रमणमा १३ जनाको मृत्यु भएको छ। लेबनानी स्वास्थ्य मन्त्रालयका अनुसार आक्रमणले इस्लामिक स्वास्थ्य प्राधिकरण र रिसाला स्काउट्सद्वारा सञ्चालित आपतकालीन बिन्दुलाई लक्षित गरेको थियो। यसमा दुई उद्धारकको मृत्यु र पाँच घाइते भएका छन्।
नाबातिएहमा इजरायली हवाई आक्रमणले एक घरमा बालिकासहित ६ जनाको मृत्यु गराएको छ। बिन्त जबेल र तटीय शहर गाजिएहमा आक्रमण हुँदा थप पाँच जनाको ज्यान गएको छ। दक्षिण सीमावर्ती गाउँ मेस अल–जबालमा युनिफिलको नेपाली बटालियन परिसरमा पनि गोला खस्दा कुनै नेपाली सैनिक घाइते नभएको नेपालका मानार्थ महावाणिज्य दूतावासले जनाएको छ।
हिजबुल्लाहले इजरायली लक्ष्यहरू विरुद्ध प्रतिशोधात्मक रकेट प्रहार गरेको बताएको छ। समूहले दक्षिण लेबनानका विभिन्न सैन्य र ड्रोन नियन्त्रण स्थललाई निशाना बनाएको छ। इजरायलले बेरुतको दक्षिणी उपनगरहरूमा हिजबुल्लाहको गढलाई लक्षित गर्दै हवाई आक्रमण जारी राखेको छ।
संयुक्त राष्ट्र शान्ति सेनाको स्थानमा गोलाबारी हुनु अन्तर्राष्ट्रिय कानूनको उल्लंघन भएको नेपालले जनाउँदै सुरक्षा र सतर्कता कायम गर्न जोड दिएको छ। घटना दक्षिण लेबनान–इजरायल द्वन्द्वमा नयाँ तनाव थप्ने संकेत मानिएको छ।
