सुदूरपश्चिम प्रदेशका मुख्यमन्त्री कमलबहादुर शाहले फाप्ला अन्तर्राष्ट्रिय क्रिकेट रंगशाला र खेलग्राम निर्माणलाई प्रदेश सरकारले उच्च प्राथमिकतामा राखेको बताएका छन्। शनिबार मुख्यमन्त्री शाह र परियोजना समितिका अध्यक्ष सुवाश शाहीबीच भएको भेटमा अध्यक्ष शाहीले परियोजनाको हालसम्मको प्रगति विवरण पेश गर्दै आगामी बजेटमा सहयोगको आग्रह गरे।
मुख्यमन्त्री शाहले सुदूरपश्चिमको खेल र मनोरञ्जन क्षेत्रमा महत्वपूर्ण स्थान राख्ने यो परियोजनालाई उच्च प्राथमिकतामा राख्ने र थप बजेट विनियोजनका लागि संघीय सरकारसँग आवश्यक पहल गर्ने प्रतिबद्धता व्यक्त गरे। धनगढीमा निर्माणाधीन खेलग्रामको डीपीआर निर्माण र वातावरणीय प्रभाव मूल्यांकन (EIA) जस्ता प्राविधिक कामहरू पहिले नै सम्पन्न भइसकेको छ। अध्यक्ष शाहीका अनुसार पहिलो चरणमा परियोजना निर्माणका लागि करिब ११ अर्ब रुपैयाँ बजेट आवश्यक पर्छ।
यो पहलले प्रदेशमा खेलकुदको विकास, युवाहरूको प्रतिभा प्रवर्द्धन र अन्तर्राष्ट्रिय स्तरको क्रिकेट संरचना निर्माणमा ठूलो योगदान पुर्याउने अपेक्षा गरिएको छ। प्रदेश सरकारले परियोजनामा सहकार्य र लगानी सुनिश्चित गरेर खेलकुदलाई व्यावसायिक र प्रतिस्पर्धात्मक रूपमा अघि बढाउने लक्ष्य राखेको छ।
