अत्तरियाः संघीय सांसद केपी खनालको नेतृत्वमा गएको टोलीले शहीद दशरथ चन्द स्वास्थ्य विज्ञान विश्वविद्यालयमा अविलम्ब चिकित्सा शिक्षा सञ्चालनको वातावरण बनाउन शिक्षा मन्त्री Sasmita Pokharel सँग माग गरेको छ। टोलीले विश्वविद्यालयलाई पूर्ण रूपमा सञ्चालनमा ल्याउन आवश्यक नीति, बजेट र संरचनागत तयारी तत्काल अघि बढाउन आग्रह गरेको हो।
मन्त्रालयमा भएको छलफलमा टोलीले कम्तिमा ३०० शय्याको अस्पतालको संगठन तथा व्यवस्थापन सर्वेक्षण (O&M) पारित गर्न, अस्पताललाई शिक्षण अस्पतालमा रूपान्तरण गरी आधुनिक उपकरणसहित विशेषज्ञ सेवा सञ्चालन गर्न माग राखेको थियो। साथै, चिकित्सा शिक्षा सुरु गर्न आवश्यक पूर्वाधार निर्माण र बजेट सुनिश्चित गर्न पनि जोड दिइएको छ।
टोलीमा विश्वविद्यालयका उपकुलपति प्रा. डा. सुनिल कुमार जोशी, रजिस्टार डा. खेमराज जोशी, डा. भीमबहादुर चन्द तथा विश्वविद्यालय स्थापनार्थ संघर्ष समितिका संयोजक लोकराज पाण्डेय (आगो) सहभागी थिए। उनीहरूले जनशक्ति व्यवस्थापनका लागि पदपूर्ति समिति गठन गर्नुपर्ने आवश्यकता औंल्याएका छन्।
सांसद खनालले आगामी आर्थिक वर्षमै चिकित्सा शिक्षा अध्ययन सुरु गरी ३०० शय्याको अस्पताल सञ्चालनमा ल्याउनुपर्नेमा जोड दिएका छन्। जवाफमा शिक्षा मन्त्री पोखरेलले चाँडै विश्वविद्यालय सभा बस्ने र आवश्यक बजेट व्यवस्थापनमा सरकार सक्रिय रहेको बताएका छन्।
