इन्डोनेसियाको मोलुका टापु नजिकै आज बिहान ७.४ म्याग्निच्युडको शक्तिशाली भूकम्प गएको छ। स्थानीय समयअनुसार बिहान ६:४८ बजे गएको यस भूकम्पले इन्डोनेसियासहित फिलिपिन्स र मलेसियाका तटीय क्षेत्रमा समेत सुनामीको जोखिम बढाएको छ। प्रारम्भमा ७.८ म्याग्निच्युड मापन गरिएको भए पनि पछि संशोधन गरी ७.४ कायम गरिएको अमेरिकी भूगर्भ सर्वेक्षणले जनाएको छ। भूकम्पको केन्द्रविन्दु टेर्नेट शहरबाट करिब १२० किलोमिटर टाढा मोलुका सागरमा रहेको थियो।
भूकम्पपछि हवाईस्थित सुनामी चेतावनी केन्द्रले एक हजार किलोमिटरभित्रका तटीय क्षेत्रमा समुद्री छाल आउन सक्ने भन्दै उच्च सतर्कता अपनाउन आग्रह गरेको छ। त्यसपछि ५.५ र ५.२ म्याग्निच्युडका पराकम्पहरू पनि गएको जनाइएको छ, जसले थप जोखिम बढाएको छ।
स्थानीय खोज तथा उद्धार टोलीका अनुसार भग्नावशेषले थिचिएर ७० वर्षीया एक महिलाको मृत्यु भएको छ भने केही संरचनाहरूमा ठूलो क्षति पुगेको छ। भवनहरू चर्किएका, फर्निचर बाहिर फ्याँकिएका र धातुका संरचना बाङ्गिएका दृश्यहरू सार्वजनिक भएका छन्।
इन्डोनेसिया ‘रिङ अफ फायर’ क्षेत्रमा पर्ने भएकाले यहाँ बारम्बार भूकम्प र ज्वालामुखी गतिविधि हुने गर्दछ। राष्ट्रिय भूगर्भ एजेन्सीले थप पराकम्प आउन सक्ने भन्दै तटीय क्षेत्र र जोखिमयुक्त स्थानबाट टाढा रहन नागरिकलाई आग्रह गरेको छ।
जापानको मौसम विज्ञान एजेन्सीले पनि केही तटीय क्षेत्रमा समुद्री सतहमा सामान्य परिवर्तन देखिन सक्ने चेतावनी दिएको छ, तर ठूलो सुनामीको सम्भावना कम रहेको बताएको छ।
विगतका वर्षहरूमा पनि इन्डोनेसियामा विनाशकारी भूकम्पका घटना भएका छन्, जसले ठूलो मानवीय क्षति पुर्याएका थिए। यसपटक पनि सुरक्षा सतर्कता उच्च बनाइएको छ।
