सुदूरपश्चिम प्रदेशमा नयाँ वर्षको पहिलो दिन आज बिसु पर्व धुमधामका साथ मनाइँदैछ। स्थानीय संस्कार र परम्परासँग जोडिएको यो पर्वलाई यहाँ विशेष उत्सवका रूपमा लिने गरिन्छ। बिसुको अवसरमा घरघरमा मीठा परिकार बनाउने, परिवार र इष्टमित्रसँग भेला हुने तथा खुसी साटासाट गर्ने चलन रहेको छ।
यस पर्वको मुख्य आकर्षण सिस्नोपानी हो। देवर–भाउजु, नन्द–भाउजु तथा साली–भिनाजुबीच सिस्नो छ्यापेर रमाइलो गर्ने परम्परा रहिआएको छ। सिस्नो लगाउँदा वर्षभरि रोग नलाग्ने, छालासम्बन्धी समस्या निको हुने जनविश्वास छ।
बिसु आउनुअघि नै घरलाई रातो माटो र कमेरोले लिपपोत गर्ने चलन छ। यसो गर्दा वर्षभरि सुख, शान्ति र समृद्धि आउने विश्वास गरिन्छ। वैशाख सुरु भएसँगै रोगब्याधी र विपत्तिबाट जोगिन सिस्नो प्रयोग गर्ने परम्पराले विशेष महत्व राख्छ।
रोजगारीका लागि भारतलगायत बाहिर गएका मानिसहरू पनि बिसु मनाउन घर फर्किने गरेका छन्, जसले पारिवारिक एकता अझ मजबुत बनाउँछ। यस दिन विभिन्न शक्तिपीठमा पूजा, मेला र धार्मिक गतिविधि सञ्चालन हुन्छन्।
स्थानीय परिकार जस्तै लौन, सेल, माणा, पुरी, बटुक र डुब्का खाँदै, आपसी मेलमिलाप र संस्कृतिको संरक्षण गर्दै बिसु पर्व उल्लासपूर्वक मनाउने गरिन्छ।
