अमेरिकी राष्ट्रपति डोनाल्ड ट्रम्पले इरानसँग जारी तनाव अन्त्यका लागि यसै साता पुनः वार्ता सुरु हुन सक्ने संकेत दिएका छन्। यसअघि इस्लामावादमा भएको उच्चस्तरीय वार्ता निष्कर्षविहीन बनेपछि अमेरिका र इरानबीच तनाव थप चुलिएको थियो।
वार्ता असफल भएलगत्तै अमेरिकाले इरानी बन्दरगाहहरूमा नाकाबन्दी लगाएको थियो। ट्रम्पले न्युयोर्क पोस्टलाई दिएको अन्तर्वार्तामा आगामी दुई दिनभित्रै सकारात्मक विकास हुन सक्ने दाबी गरेका छन्। यसबीच अमेरिकी सेनाले होर्मुज स्ट्रेटमा कडा निगरानी र नाकाबन्दी जारी राखेको जनाएको छ, जसका कारण केही जहाजहरूको आवागमन प्रभावित भएको छ।
संयुक्त राष्ट्रसङ्घका महासचिव एन्टोनियो गुटेरेसले वार्ता पुनः सुरु हुने सम्भावना बलियो रहेको बताएका छन्। यद्यपि इरानले हालसम्म कुनै औपचारिक प्रतिक्रिया दिएको छैन।
तनावका बाबजुद तेल बजारमा केही सुधार देखिएको छ। वार्ताको सम्भावनाले मंगलबार कच्चा तेलको मूल्य प्रति ब्यारेल १०० डलरभन्दा तल झरेको छ, जसले विश्व बजारलाई आंशिक राहत दिएको छ।
यसैबीच, अमेरिकी सेन्ट्रल कमाण्डले नाकाबन्दीपछि केही जहाजहरू फर्किएको दाबी गरेको छ भने बीबीसीको विश्लेषणले केही मालवाहक जहाज अझै होर्मुज जलसन्धि पार गरिरहेको देखाएको छ।
इरानको आणविक कार्यक्रम मुख्य विवादको विषय बनेको छ। अमेरिका पूर्ण रूपमा युरेनियम प्रशोधन रोक्न दबाब दिइरहेको छ भने इरान सीमित समयका लागि मात्र रोक्ने पक्षमा रहेको बताइएको छ।
अन्तर्राष्ट्रिय मुद्रा कोष (आईएमएफ) ले यस द्वन्द्वले विश्व अर्थतन्त्रमा मन्दीको जोखिम बढाउन सक्ने चेतावनी दिएको छ। चीनले अमेरिकी नाकाबन्दीलाई खतरनाक भन्दै आलोचना गरेको छ।
