त्रिभुवन आर्मी क्लबले अपराजित रहँदै पीएम कप पुरुष राष्ट्रिय क्रिकेट प्रतियोगिताको उपाधि तेस्रो पटक जितेको छ। वीरगन्जमा सम्पन्न फाइनलमा आर्मीले सुदूरपश्चिम प्रदेशलाई ५ विकेटले पराजित गर्यो।
सुदूरले दिएको १६२ रनको लक्ष्य आर्मीले ३४.३ ओभरमा पूरा गर्यो। इमरान शेखले अविजित ४६ रन र बसिर अहमदले ४५ रन बनाउँदै ९६ रनको निर्णायक साझेदारी गरे। सुदूरका हेमन्त धामीले २ विकेट लिए।
पहिले ब्याटिङ गरेको सुदूर १६१ रनमै अलआउट भयो। अशोक धामीले ४३ रन बनाउँदा आर्मीका आकाश चन्द र शाहब आलमले ३–३ विकेट लिए।
आर्मी प्रतियोगिताभर अपराजित रह्यो, लिग चरणमा ८ खेल जित्दै फाइनलमा पुगेको हो। सुदूर पहिलोपटक फाइनल खेलेको थियो। आर्मीले यसअघि २०१७ र २०२१ मा उपाधि जितेको थियो।
