युद्धविरामको समयसीमा सकिन लाग्दा अमेरिका र इरानबीच सम्भावित दोस्रो चरणको वार्ताले अन्तर्राष्ट्रिय चासो तानेको छ। विशेषतः चीनले वार्तालाई अगाडि बढाउने विषयमा सक्रियता देखाउँदै पाकिस्तानमार्फत भइरहेको प्रयासलाई पूर्ण समर्थन जनाएको छ। यसै सन्दर्भमा पाकिस्तानका उपप्रधानमन्त्री इशाक डार र चीनका राजदूत जियाङ जायदोंग बीच भेटवार्ता भएको छ।
इरानका एक वरिष्ठ अधिकारीले पाकिस्तानमा अमेरिकासँग सम्भावित वार्तामा सहभागी हुनेबारे विचार भइरहेको संकेत दिएका छन्। तर, इरानभित्रै यस विषयमा एकमत देखिएको छैन। Islamic Revolutionary Guard Corps निकट स्रोतहरूले इरानले अमेरिका र इजराइललाई दबाबमा पारेको दाबी गरेका छन्।
उता संसदका सभामुख मोहम्मद बाघेर गालिबाफ ले अमेरिकी राष्ट्रपति डोनाल्ड ट्रम्प को धम्कीबीच वार्ता अस्वीकार्य हुने बताएका छन्। इरानको विदेश मन्त्रालयले भने वार्ताबारे अन्तिम निर्णय नभएको स्पष्ट पार्दै स्थिति अझै अनिश्चित रहेको जनाएको छ।
