अमेरिकी राष्ट्रपति डोनाल्ड ट्रम्पले सामाजिक सञ्जाल ट्रुथ सोसलमा भारतलाई ‘नरक जस्तो ठाउँ’ भन्दै गरिएको टिप्पणीपछि भारत–अमेरिका सम्बन्धमा राजनीतिक विवाद उत्पन्न भएको छ। उक्त टिप्पणी दक्षिणपन्थी रेडियो होस्ट माइकल स्याभेजको भनाइलाई आधार मानेर गरिएको हो, जसमा आप्रवासी नीतिबारे कडा आलोचना गरिएको थियो।
ट्रम्पले बिना टिप्पणी उक्त पोस्ट शेयर गरेपछि भारतमा व्यापक प्रतिक्रिया देखिएको छ। भारतको विदेश मन्त्रालयले यसलाई ‘अज्ञानतापूर्ण, अनुचित र निम्नस्तरको’ भन्दै कडा आपत्ति जनाएको छ। मन्त्रालयले भारत–अमेरिका सम्बन्ध आपसी सम्मान र साझा हितमा आधारित रहेको स्पष्ट पारेको छ।
यद्यपि भारतले अत्यधिक आक्रामक प्रतिक्रिया नदिई कूटनीतिक सन्तुलन कायम गरेको देखिन्छ। विश्लेषकहरूका अनुसार अमेरिका सँग चलिरहेको स्वतन्त्र व्यापार सम्झौताको वार्तालाई ध्यानमा राख्दै भारतले संयमित रणनीति अपनाएको हो।
अमेरिकी दूतावासले भने ट्रम्पको भनाइलाई नरम पार्दै भारतलाई ‘महान देश’ र मित्रवत सम्बन्धको संकेत गरेको छ। यस घटनाले दुवै देशबीच कूटनीतिक संवेदनशीलता बढाएको विश्लेषण गरिएको छ।
