शनिबारको पावन दिन शनिदेवको आराधना गरी जीवनमा सकारात्मक ऊर्जा र शुभफल प्राप्त गर्न सकिन्छ। शनिदेव कर्मका न्यायाधीश मानिन्छन्, जसले व्यक्तिका कर्मअनुसार फल प्रदान गर्छन्। उनी सूर्यदेवका पुत्र, यमराजका दाजुभाइ र यमुनाका सहोदरका रूपमा वर्णित छन्।
धर्मशास्त्रअनुसार सत्य, अनुशासन र परिश्रममा लाग्ने व्यक्तिमाथि शनिदेव प्रसन्न रहन्छन्। शनिबार व्रत बस्नुका साथै सरसफाइ, शान्त मन र श्रद्धापूर्वक पूजा गर्नु महत्त्वपूर्ण मानिन्छ। यस दिन तेल दान गर्नु, विशेषगरी कालो तिल अर्पण गर्नु शुभ फलदायी मानिन्छ।
पिपलको रुखमा जल अर्पण गरी पूजा गर्दा पुण्य प्राप्त हुने विश्वास छ। साथै शमीको रुखको पूजा गर्नु र छालाका जुत्ता–चप्पल दान गर्नु पनि कल्याणकारी मानिन्छ। शनिबार हनुमान चालीसा पाठ गर्दै हनुमान सामु सर्सुको तेलको दीप प्रज्वलन गर्दा शनिदेवको कृपा प्राप्त हुने धार्मिक मान्यता रहेको छ।
