बैतडी जिल्लामा करिब ११०.४ हेक्टर वन क्षेत्र अतिक्रमणमा परेको डिभिजन वन कार्यालयले जनाएको छ। जिल्लाभर ८६ हजार ५८१ हेक्टर वन क्षेत्रमध्ये विभिन्न पालिका र बजार क्षेत्रमा अतिक्रमण बढ्दै गएको देखिएको छ।
सुर्नया गाउँपालिका र पुर्चौंडी नगरपालिकाको सीमा क्षेत्र ढोले बजार, गिरिजाबगर, जमीटाड, रुइनचौर लगायतका स्थानमा वन क्षेत्र अतिक्रमण भएको छ। साथै रसेडाखाली, साँफेबगर बजार क्षेत्र, टकरे, जुकेपानी, गर्जे र मडेखोला क्षेत्रमा पनि वन अतिक्रमण फैलिएको छ।
डिलाशैनी गाउँपालिकाका दुलर्भ सामुदायिक वन, दशरथचन्द नगरपालिका–९ गिवाखोला, दनपा–१ रतेडी, मेलौलीका कृष्ण र दुर्गा वेताल सामुदायिक वन क्षेत्र पनि प्रभावित भएका छन्।
पाटन बजार र बुढीचौर क्षेत्रमा सडक विस्तारसँगै घर तथा पसल निर्माणले वन क्षेत्र घट्दै गएको छ। डिभिजन वन कार्यालयका अनुसार नियन्त्रण प्रयास जारी रहे पनि अतिक्रमण चुनौतीपूर्ण बन्दै गएको छ।
