माध्यमिक शिक्षा परीक्षा (एसईई) को नतिजा सार्वजनिक भएसँगै असार १ गतेदेखि कक्षा ११ मा भर्ना अभियान सुरु हुने भएको छ। नेपाल परीक्षा बोर्डले एक महिनाभित्रै नतिजा सार्वजनिक गरेपछि भर्ना प्रक्रिया पनि छिटो अघि बढाइएको हो। केही विद्यालयहरूले त नतिजा प्रकाशित भएकै भोलिपल्टदेखि अनलाइन तथा भौतिक दुवै माध्यमबाट आवेदन लिन सुरु गरिसकेका छन्।
काठमाडौं महानगरपालिकाले छात्रवृत्तिका लागि अनलाइन फाराम खुला गरिसकेको छ। तर अघिल्लो शैक्षिक सत्रका कक्षा ११ का पठनपाठन र वार्षिक परीक्षा नसकिँदै नयाँ भर्ना सुरु हुँदा विद्यालयहरूमा दुई ब्याच व्यवस्थापनको चुनौती देखिएको छ। परीक्षा, नयाँ कक्षा सञ्चालन र छात्रवृत्ति प्रक्रियाबीच समय व्यवस्थापन कसरी गर्ने भन्ने प्रश्न उठिरहेको छ।
यद्यपि सरोकारवालाहरूले यसपटक कुनै ठूलो अन्योल नहुने दाबी गरेका छन्। उच्च शिक्षालय तथा माध्यमिक विद्यालय संघ नेपाल (हिसान) का पूर्व महासचिव लोकबहादुर भण्डारीले सरकारको समय तालिका सकारात्मक भएको बताउँदै शैक्षिक व्यवस्थापन सहज हुने विश्वास व्यक्त गरेका छन्। निजी तथा आवासीय विद्यालय संगठन (प्याब्सन) का अध्यक्ष कृष्ण अधिकारीले असारको पहिलो सातादेखि नै कक्षा ११ को पठनपाठन सुरु गर्ने तयारी भइरहेको जानकारी दिएका छन्।
शिक्षा मन्त्रालयले पनि शैक्षिक सत्र समयमै सञ्चालन गर्न आन्तरिक तयारी अन्तिम चरणमा पुर्याएको जनाएको छ। मन्त्रालयका सहसचिव रूद्रप्रसाद अधिकारीका अनुसार भर्ना अभियानलाई औपचारिक रूपमा असार १ गतेदेखि लागू गर्ने निर्णय केही दिनमै सार्वजनिक हुनेछ। यसले विद्यार्थी भर्ना र पठनपाठन समयमै सुरु हुने अपेक्षा गरिएको छ।
