युद्ध अन्त्य गर्ने विषयमा जारी वार्ता अवरुद्ध भएपछि अमेरिकी राष्ट्रपति डोनाल्ड ट्रम्पले इरानलाई कडा चेतावनी दिएका छन्। उनले आफ्नो ट्रुथ सोसल प्लेटफर्ममार्फत “छिटो अघि बढ, नत्र केही बाँकी रहने छैन” भन्दै समय निकै महत्वपूर्ण भएको उल्लेख गरेका छन्। यो अभिव्यक्ति इजरायली प्रधानमन्त्री बेन्जामिन नेतन्याहुसँगको वार्ताअघि आएको हो।
यसैबीच, इरानी सञ्चारमाध्यमहरूले अमेरिकाले तेहरानका प्रस्तावहरूमा कुनै ठोस सहमति नदिएको जनाएका छन्। मेहर समाचार एजेन्सीका अनुसार वार्तामा प्रगति नभए गतिरोध अझ गहिरिन सक्छ। इरानले युद्धविराम, अमेरिकी नाकाबन्दी अन्त्य र सुरक्षा ग्यारेन्टीसहितका माग अघि सारेको छ।
ट्रम्पले यसअघि पनि इरानलाई कठोर चेतावनी दिँदै आएको र पछिल्लो वक्तव्य पनि त्यही शैलीमा आएको बताइएको छ। इरानी पक्षले आफ्ना मागहरूलाई “जिम्मेवार” भन्दै वार्तामा अडान लिएको छ।
फार्स समाचार एजेन्सीका अनुसार अमेरिकाले इरानलाई आणविक कार्यक्रम सीमित गर्ने र उच्च संवर्धित युरेनियम हस्तान्तरण गर्ने सर्त राखेको छ। ट्रम्पले भने इरानको आणविक कार्यक्रम २० वर्ष स्थगित भए स्वीकार्य हुने संकेत गरेका छन्, जसले उनको अघिल्लो कडा अडानमा केही परिवर्तन देखाएको छ।
हर्मुज जलडमरुमध्यको नियन्त्रण र तेल ढुवानीमा असर परेपछि विश्व बजारमा पनि तनाव बढेको छ। पाकिस्तानले मध्यस्थता प्रयास गरे पनि दुवै पक्षबीच दूरी अझै कायम रहेको छ।
