इरानले आफ्नो संवर्धित युरेनियम भण्डार विदेश नपठाउने स्पष्ट संकेत दिएको छ। इरानका सर्वोच्च नेतृत्वको निर्देशनअनुसार देशको रणनीतिक महत्वको आणविक सामग्री बाहिर सार्न नसकिने बताइएको छ। इरानी पक्षको बुझाइमा यस्तो कदमले भविष्यमा अमेरिका र इजरायलबाट हुने सम्भावित सुरक्षा जोखिम बढाउन सक्छ।
स्रोतहरूका अनुसार इरानले युरेनियम स्थानान्तरणको विकल्पमा अन्तर्राष्ट्रिय आणविक ऊर्जा एजेन्सी (आईएईए)को निगरानीमा भण्डारण व्यवस्थापन वा परिमाण घटाउने विकल्पमा छलफल गर्न सक्ने संकेत दिएको छ। आईएईएको अनुमानअनुसार इरानसँग ६० प्रतिशत शुद्धताको ४४० किलोभन्दा बढी संवर्धित युरेनियम रहेको बताइएको छ।
यसबीच, इरानले अमेरिका तर्फबाट आएको पछिल्लो मस्यौदा प्रस्तावमाथि प्रतिक्रिया तयार गरिरहेको जनाएको छ। इरानी सञ्चारमाध्यमका अनुसार प्रस्तावले केही मतभेद कम गरे पनि थप विश्वास निर्माण र युद्धको जोखिम अन्त्य गर्ने सुनिश्चितता आवश्यक रहेको तेहरानको धारणा छ।
युद्धविरामपछि दुवै पक्षबीच शान्ति प्रयास जारी रहे पनि औपचारिक सहमति हुन सकेको छैन। पाकिस्तानको मध्यस्थतामा वार्तालाई अगाडि बढाउने प्रयास भइरहेका छन् भने क्षेत्रीय तनावलाई कूटनीतिक माध्यमबाट समाधान गर्ने प्रयास तीव्र बनाइएको छ।
