कञ्चनपुरको महेन्द्रनगर–भाँसीस्थित न्यू रोयल दरबार होटलमा सोमबार मध्यराति भएको घटनापछि जिल्ला प्रहरी कार्यालयको भूमिकामाथि प्रश्न उठेको छ। होटल सञ्चालक प्रकाश कार्कीका अनुसार चार जनाको समूहले होटल बाहिर तोडफोड सुरु गरेपछि प्रहरीलाई खबर गरिएको थियो। तर घटनास्थल पुगेको प्रहरी टोलीले संलग्न व्यक्तिलाई नियन्त्रणमा लिन नसकी उनीहरू भाग्न दिएको दाबी गरिएको छ।
होटल पक्षका अनुसार तोडफोडमा संलग्न समूह मोटरसाइकल छाडेर फरार भएको थियो। तर प्रहरीले घटनामा संलग्नलाई पक्राउ गर्नुको सट्टा होटलका कर्मचारी र त्यहाँ रहेका ग्राहकलाई नियन्त्रणमा लिएको आरोप लगाइएको छ।
प्रहरीले होटल कर्मचारी सन्तोष भण्डारीसहित केही व्यक्तिमाथि अभद्र व्यवहार मुद्दा चलाएको छ। पक्राउ परेकामध्ये केही ग्राहक मात्र रहेको दाबी गरिएको छ।
यता कञ्चनपुरका प्रहरी प्रमुख Netramani Giriले मदिरा सेवन गरेका दुई समूहबीच विवाद भएपछि प्रहरी परिचालन गरिएको र फरार समूहको खोजी भइरहेको बताएका छन्। निर्दोष पक्राउ गरिएको आरोप अस्वीकार गर्दै कानुनअनुसार कारबाही अघि बढाइएको उनले बताएका छन्।
