अत्तरियाः धनगढी–५ तारानगरस्थित एक्सिस विद्याश्रम सुदूरपश्चिम प्रदेशकै एक प्रतिष्ठित शैक्षिक संस्थाका रूपमा स्थापित हुँदै गएको छ । कक्षा ११ र १२ मा व्यवस्थापन, विज्ञान र कानुन संकाय अध्यापन गराउँदै आएको यस विद्यालयले कक्षा ११ को पठनपाठन सुरु गरेको एक दशक मात्र पूरा गरेको भए पनि विद्यार्थी र अभिभावकको पहिलो रोजाइ बन्न सफल भएको हो । पर्याप्त भौतिक पूर्वाधार, अनुभवी शिक्षक–शिक्षिका, प्रयोगात्मक शिक्षण प्रणाली, व्यवस्थित यातायात सुविधा र सक्षम नेतृत्वका कारण विद्यालयले निरन्तर लोकप्रियता बढाइरहेको छ ।
विद्यालयका प्लस टु कार्यक्रम संयोजक घनश्याम मलासीका अनुसार पारिवारिक वातावरणमा कुनै अतिरिक्त दबाबबिना अध्यापन गराइने भएकाले विद्यार्थीहरू सहज र आकर्षित हुने गरेका छन् । उनका अनुसार व्यवस्थापन, विज्ञान र कानुन संकायमा हरेक वर्ष करिब ४०० देखि ४५० विद्यार्थी भर्ना हुने गरेका छन् भने यस वर्ष पनि प्रवेश परीक्षाका लागि करिब ४०० फारम वितरण भइसकेको छ ।
विद्यालयमा आधुनिक विज्ञान प्रयोगशाला, सुविधा सम्पन्न कम्प्युटर ल्याब, पुस्तकालय तथा स्मार्ट बोर्डको व्यवस्था छ । लामो समयदेखि अनुभवी शिक्षक–कर्मचारीको स्थायी टिमले शिक्षण कार्यलाई थप प्रभावकारी बनाएको छ ।
धनगढीमा कक्षा ११ र १२ मा कानुन विषय अध्यापन गराउने पहिलो विद्यालय भएकाले कानुन संकायप्रति विद्यार्थीहरूको आकर्षण झनै बढेको छ । एक्सिस विद्याश्रमका पूर्वविद्यार्थीहरू स्नातक तहमा समेत उत्कृष्ट नतिजासहित अध्ययनरत रहेको र कैलाली बहुमुखी क्याम्पस लगायतका संस्थामा राम्रो प्रदर्शन गरिरहेको विद्यालय प्रशासनले जनाएको छ ।
विद्यालयले सैद्धान्तिक शिक्षासँगै प्रयोगात्मक सिकाइलाई विशेष प्राथमिकता दिँदै आएको छ । स्थापनाकालदेखि नै प्रधानाध्यापक अनिता पन्तको नेतृत्वमा सञ्चालित विद्यालयले उनीकै कुशल व्यवस्थापनका कारण उल्लेखनीय प्रगति गरेको हो । सुदूरपश्चिममै पहिलो महिला प्लस टु प्रधानाध्यापकको रूपमा परिचित पन्तको नेतृत्वपछि विद्यालयले शैक्षिक उचाइ हासिल गरेको बताइन्छ ।
हाल धनगढी–५ हसनपुरमा कक्षा १० सम्म तथा तारानगरमा प्ले ग्रुपदेखि कक्षा १२ सम्म सञ्चालन भइरहेको यस विद्यालयमा २७०० भन्दा बढी विद्यार्थी अध्ययनरत रहेका छन् ।
