डोटीको जोरायल राजनीतिक वृत्तमा सक्रिय युवा नेतृत्वलाई थप सुदृढ गर्दै समितिको नयाँ नेतृत्व चयन गरिएको छ। राष्ट्रिय स्वतन्त्र पार्टी जोरायल गाउँपालिका समितिको प्रथम अधिवेशनले निराजन बिष्टको संयोजकत्वमा नयाँ कार्यसमिति गठन गरेको हो।
राजनीतिक वृत्तमा युवा नेतृत्वको प्रभावशाली उपस्थितिका रूपमा परिचित बिनोद सिंह बोहरा राष्ट्रिय स्वतन्त्र पार्टी (रास्वपा) जोरायल गाउँपालिका समितिको सचिव पदमा पुनः चयन भएका छन्। संगठन निर्माणको प्रारम्भिक चरणदेखि सक्रिय रहँदै आएका बोहरा समितिका संस्थापक संयोजक समेत हुन्।
नयाँ राजनीतिक शक्तिलाई गाउँस्तरसम्म विस्तार गर्ने अभियानमा नेतृत्वदायी भूमिका निर्वाह गरेका बोहराले सीमित स्रोत र चुनौतीपूर्ण अवस्थाका बीच संगठनलाई जनस्तरसम्म पुर्याउन महत्वपूर्ण योगदान दिएका थिए। कार्यकर्ता परिचालन, संगठन विस्तार र जनसरोकारका मुद्दामा निरन्तर सक्रिय रहँदै आएका उनी छोटो समयमै प्रभावशाली युवा नेताका रूपमा स्थापित भएका छन्।
अधिवेशनले स्थानीय तहमा संगठनलाई थप सशक्त, गतिशील र प्रभावकारी बनाउने उद्देश्यसहित नयाँ नेतृत्व चयन गरेको बताइएको छ। संयोजक बिष्टले संगठनलाई जनमुखी, पारदर्शी र वैकल्पिक राजनीतिक शक्तिका रूपमा स्थापित गर्ने प्रतिबद्धता जनाएका छन्।
नयाँ समितिले कार्यकर्ता परिचालन, संगठन विस्तार र स्थानीय विकासका मुद्दामा सक्रिय भूमिका खेल्ने अपेक्षा गरिएको छ। यससँगै जोरायलको राजनीतिक गतिविधिमा युवा नेतृत्वको प्रभाव अझ मजबुत हुने संकेत देखिएको छ।
